Helgarlagið Bubamara

Eitt skondnasta lag kvikmyndanna er Bubamara úr mynd Emir Kusturica Svartur köttur, hvítur köttur. Lagið er afurð af samstarfi við lagasmiðinn Goran Bregovic um að semja sígaunatónlist. Þessir menn eru báðir aldir upp í fyrrum Júgóslavíu, kynntust ungir í Sarajevo með háleita drauma um opnara þjóðfélag og lífstíl Vesturlanda. En við fall kommúnismans tók ekki betra við, því sundrungin bjó í þjóðernisvakningunni. Emir er serbi og múslimi. En Goran er af eins margslungnum uppruna og hægt er. Foreldrarnir frá Serbíu og Króatíu. Hann kristinn en kona hans múslimi.

Emir Kusturica er bæði þekktur sem tónlistarmaður og kvikmyndagerðarmaður. Hljómsveit hans nefnist The No Smoking Orchestra. Goran Bregovic er einn þekktasti lagahöfundur og tónlistarmaður af Balkanskaga. Lagasmíðar hans eru óvenjulegar, mótaðar af straumum úr ýmsum áttum. 

 

Helgarlagið Shall We Dance?

Bíómyndin Shall We Dance með Richard Gere og Jennifer Lopez í aðalhlutverkum var sýnd í Sjónvarpinu á mánudag. Í lok myndar kom fram í texta að hún var tekin að stórum hluta í Winnipeg, Manitoba. Á þessum Íslendingaslóðum tók ég háskólapróf fyrir nok löngu. Þá sveif nú ekki suður-amerísk dansstemming yfir vötnum. Einhverjir útnefndu hana borg þungarokksins í Ameríku, enda slíkur frumkraftur meira við hæfi í frosthörkum miðhluta Kanada heldur en sólarsamba eða ástríðufullur tangó.

Í myndinni laumast lögfræðingurinn sem Richard Gere leikur á námskeið í suðrænum dönsum. Á meðfylgjandi myndbandi er hann búin að láta undan þrýstingi og æfir sig fyrir þátttöku í danssýningu skólans. Danskennarinn Jennifer Lopez nær að kynda upp kröftuga sveiflu í gamla silfurrefnum undir lagi með Gotan Project. Ég hef haft það mér til dundurs og ánægju að safna að mér suðrænni tónlist síðustu ár og Gotan er í sérstöku uppáhaldi. Þeir spila flotta og nútímalega tangótónlist, óræð og afgerandi í senn.