"Ég ætla að blogga um þetta ... "

Áramótaskaup; 

geisp ....

geisp ....

geisp...

 

 

Gleði og gæfa á nýju ári

Sendi bloggvinum og netverjum öllum innilegar áramótaóskir. Þakka samskipti á árinu. Óvissa er um veðurfar til að kveikja elda í kvöld. En planlagt sumstaðar að tendra bál á morgun. Vil benda á að það viðrar alltaf vel á þrettándabrennu í Mosfellsbæ. Þá er líka sýning björgunarsveitarinnar Kyndils alltaf glæsileg. Álfabrennan og þátttaka leikfélagsins gera það kvöld að einni skemmtilegustu hefðinni í bæjarlífinu.

                                

Einleikur með boltann

Varmársamtökin hafa verið ánægð með þann samhljóm sem þau finna með ritstjórn Morgunblaðsins í kröfunni um eðlilega aðkomu íbúa að skipulagsvinnu. Það hefur líka verið ánægjulegt að skynja þennan tón í viðhorfum bæjarstjóra Garðabæjar. Sjálfstæðismenn í Mosfellsbæ ættu að fara í smiðju flokksfélaga hinum megin við lækinn og læra hvernig hægt er að tryggja eðlilegt jafnvægi milli hagsmuna verktaka og bæjarbúa.

Það sem að Gunnar Einarsson varar við í viðtalinu er einmitt það sem gerðist í Mosfellsbæ. Verktakar og landeigendur fá boltann og spila einleik í skjóli bindandi samninga við bæjarstjórn. ..."þá fer byggingarmagn að ráða miklu meir ferðinni en einhver heildarsýn". ..."Mér hefur fundist, þegar ég er farinn að kafa betur ofan í þessi mál, að verktakar geti ráðið hér fullmiklu".

Aumkunarverðastur er þó hlutur vinstri grænna í Mosfellsbæ sem gengust eftir síðustu kosningar undir þau jarðarmen að láta hagsmuni fjármagns og verktaka eina ráða för. Gera síðan kröfuna um aðkomu íbúa tortryggilega og telja alla þá sem bera hana upp vera hættulega útsendara Samfylkingarinnar. Morgunblaðið og vinnulag bæjarstjórans í Garðabæ undirstrika að þetta er tónn í skipulagsvinnu sem ber að virða til framtíðar. Leið sátta og ánægju meðal allra aðila.

Verktakar með boltann

Listamaður linsunnar

Eins og gerist þvælist ég stundum um á leitarvélum netheima. Það getur stundum verið ferðalag án upphafs og endis. Svo gerist það stundum að vel ber í veiði, áhugaverður texti eða myndir. Uppgötvun. Áðan rakst ég á ljósmyndir eftir breskan mann sem heitir Martin Sercombe og hann virðist ótrúlega listrænn ljósmyndari. Hann var á ferðalagi um Ísland í 12 daga í ágúst á síðasta ári. Sendi honum tölvupóst að hrósa honum fyrir myndirnar og vona að hann fyrirgefi mér að birta hér tvær þeirra.

Í myndasafninu hans á flickr er hann með myndir af Gamla bænum (1897) og kirkjunni (1886) á Stafafelli, sem að skapa frábæra stemmingu, fulla af dulúð og sjarma. Ég ólst upp í Gamla bænum og finnst hann alltaf hafa mikla sál, eins og stundum er sagt um hús. Sef hvergi dýpra og betur. Innan við tólf ára var maður kominn með það hlutverk að rölta yfir hlaðið og sýna ferðamönnum kirkjuna. Söguleg hús sem þarf að vernda og tryggja gamla bænum verðugan og virðulegan sess. Trjágarðurinn gerir líka svo fagra umgjörð um bæði húsin.

Arfhreinn vindóttur og álóttur

Síðastliðin fimmtán ár hef ég verið að leika mér við ræktun ákveðins litaafbrigðis í íslenska hestastofninum. Fjölbreytileikinn í hestalitum er einstakur og ánægjulegt að þessi verðmæti hafa fengið athygli margra ræktenda síðustu ár. Liturinn minn er vindóttur, að hafa silfurlitað fax og tagl, álóttur, að hafa dökka rönd eftir hryggnum, dekkri haus og fætur, auk þess að hafa "Zebra-línur" eða þverrákir á fótum. Grunnlitur getur verið bleikur, mólitur eða rauður.

Ég hef átt tvo stóðhesta Hrími frá Stafafelli, bleikálóttur vindóttur og Lokk frá Gullberastöðum, móálóttur vindóttur. Þessum hestum paraði ég síðan aftur á móti óskyldum vindóttum merum. Síðan paraði ég síðastlið vor saman meri á fimmta vetri undan Hrími sem heitir Hæra frá Stafafelli og stóðhestsefni á þriðja vetri undan Lokk, sem heitir Toppur frá Stafafelli. Miklar líkur eru á að ná þannig fram arfhreinum vindóttum og álóttum einstaklingum.

Þetta er því svona mendelsk tilraun í erfðafræði sem ég vonast til að klára á næsta ári. Toppur var hjá tólf merum að Svínhóli í Dalasýslu síðastliðið sumar. Ef 3/4 eða fleiri verða vindóttir og álóttir þá eru miklar líkur á að stóðhesturinn sé arfhreinn um þessi einkenni. Bæði Hrímir og Lokkur voru seldir til Austurríkis. Það er því komið þó nokkuð af vindóttum afkomendum "sem ég á" orðið á meginlandinu.

Set hér myndarunu til að sýna hversu fallegt afbrigði þetta er;

Er Pakistan tilbúið fyrir lýðræði?

Telja má víst að morðið á Benazir Bhutto muni valda mikilli ólgu í Pakistan og í raun eyðileggja kosningar sem ætlað er að fara fram í byrjun nýs árs. Ekki er ólíklegt að gripið verði til aðgerða af hálfu stjórnvalda í ætt við herlög sem að takmarka enn og aftur mannréttindi einstaklinga.

 

Samkennari síðustu ár hefur verið pakistani að nafni Maxwell Ditta. Sérlega þægilegur maður og vel gefinn. Vegna þeirra tengsla ákvað Borgarholtsskóli á tíu ára afmæli sínu að byggja barnaskóla í Jarawala í samvinnu við ABC barnahjálp. Myndin er af skólanum og nemendum þegar starfsemi var komin í gang síðastliðið vor.

Síðustu misserin hef ég haft tækifæri til að ræða við hann um stjórnmálaástandið í heimalandi hans. Meðal annars um kröfu Vesturlanda að koma á lýðræði í landinu. Efaðist hann um að pakistanar væru tilbúnir til að innleiða lýðræði. Hann taldi Musharraf hafa komið ýmsu góðu til leiðar og hann taldi hann lengi vel besta kostinn.

 

Hann áleit að ákveðnir grunnþættir eins og menntun þyrftu að vera til staðar, til að lýðræðið næði að þróast. En nú bar svo við fyrir þessar kosningar að menntamenn í landinu hafa snúist gegn Musharraf. Háværustu andstæðingar hans hafa verið lögfræðingar sem mótmæla afskiptum hans af dómskerfinu. 

Maxwell taldi að nauðsynlegt hefði verið fyrir komandi kosningar að fá sterkan þriðja aðila í framboð sem að ætti ekki þá vafasömu fortíð sem tengja mætti bæði við feril Bhutto og Musharraf. Það er erfitt fyrir Vesturlandabúa að skilja afhverju hin vel menntaða og sjarmerandi kona sem Benazir Bhutto var, naut ekki meiri lýðhylli og tækifæra. 

Óljóst hvernig dauða Bhutto bar að

Blóm vikunnar Hrútaber

Planta vikunnar er hrútaberjalyng, en hún finnst í gróðursælum brekkum og skógarbotnum víða um land. Finnst nauðsynlegt að setja smá sultu með steikinni og mun örugglega lauma smá slettu á diskinn með kalkúninum frá Reykjum sem verið hefur á borðum hér síðustu ár á gamlárskvöldi. Þó krækiber og bláber séu helst nýtt af berjum til sultugerðar hér á landi, þá eru hrútaber einnig notuð. Þau þroskast frekar seint eins og önnur ber, en ég rakst á þessi þann 20. ágúst 2004 inn við Einstigi, inn af Austurskógum, Stafafelli í Lóni. Þar var ég reyndar að leita að villtum jarðarberjum sem að móðir mín sagði að væru þar. Hef ekki fundið þau, en mágkona mín segist hafa rekist á villt jarðarber við Vötn sem að er framar á sumarhúsasvæðinu.

Áttum við val?

Nú, þegar komið er að áramótum, langar mig að gera samantekt um þann ágreining sem kom upp við lagningu tengibrautar úr Helgafellshverfi, um Álafosskvos að Vesturlandsvegi og verið hefur áberandi á árinu. Eftir að andstaða við áformin varð ljós svöruðu yfirvöld iðulega á þeim nótum að staðsetning tengibrautar á þessum stað væri búin að vera á aðalskipulagi frá 1983. Aðalskipulag er þó ekki annað en heildarsýn hvers tíma og opið til breytinga, en ekki eitthvað meitlað í stein. Sagt var að fyrirhuguð leið tengibrautar um Álafosskvos væri niðurstaða fjölda sérfræðinga. Þegar loks fékkst aðgengi að gögnum um hina sérfræðilegu niðurstöðu, þá var ekki til neinn samanburður eða rannsóknir.  Jafnframt var því haldið fram að ef breytt væri frá fyrirliggjandi stefnu og samningum við verktaka, þá gætu þeir átt kröfu á bæinn um háar bætur vegna vanefnda. Það var því frá upphafi eins og skipulagsferlið með öllum sínum orðum um lögvarið áhrifavald íbúa væri sýndarmennska. Það hlýtur að vera óeðlilegt að byrja á því að tryggja hagsmuni verktakans með samningum og keyra síðan skipulagsferlið með hnefanum í gegnum þá hluta þess sem lúta að innleggi og áhrifum íbúa.

Með tilkomu Varmársamtakanna tók við margþætt atburðarás, þar sem bæjarstjórn brást endurtekið til varnar með því að villa um fyrir fólki og spilla heilnæmi umræðunnar. Samtökin höfðu ákveðið í ljósi þess að engin gögn voru til um faglegan samanburð að fjármagna hlutlausa úttekt á möguleikum við tengingu byggðarinnar við Vesturlandsveg. Þar sem samtökin leggja áherslu á íbúalýðræði þá var það mat stjórnar að nauðsynlegt væri fyrir okkur öll að hafa fastara land undir fótum, hverjir væru kostir og gallar hverrar leiðar. Samtökin lýstu því yfir að þau myndu sætta sig við niðurstöðu slíkrar úttektar, ef að fyrirliggjandi áform væru talin best að loknu slíku mati. Með sérstökum hætti, sem ekki verður rakið hér, tókst verktaka og bæjaryfirvöldum að hræða verkfræðistofuna frá slíkri vinnu. Þá voru góð ráð dýr til að koma með útspil sem gæti gert umræðuna faglegri. Farið var í að útfæra með aðstoð sérfræðinga annan valmöguleika. Tillagan fólst í því að tengingin væri í jaðri byggðar í stað þess að þrengja að söguminjum og útivist á Varmársvæðinu. Í ljósi þess ótta sem bæjaryfirvöld höfðu komið inn hjá fagfólki þá urðu samtökin að tryggja nafnleynd þeirra sem veittu ráðgjöf við tillögugerðina. Í ljósi þeirrar áherslu að það beri að fylgja aðalskipulagi  um lagningu þessa vegar frá hverfinu að Vesturlandsvegi, þá var eðlilegt að gera réð fyrir að haldið verði áfram með veginn samkvæmt skipulaginu og stefnumörkun Vegagerðarinnar um að tengibrautin fari í stokk undir Vesturlandsveg, yfir aðalgöngustíg bæjarins, vinsæla reiðgötu og í gegnum miðbæ Mosfellsbæjar.

Þegar þessar forsendur lágu fyrir, þá snérist samanburður um leið A um miðbæ, meðfram Brúarlandi, um Álafosskvos og upp brekkuna inn í hverfið og hinsvegar leið B, að fara að mislægum gatnamótum ofan byggðar og krók inn í hverfið. Með þessu hefði unnist mikið og verðmætt land til útivistar á Varmársvæðinu, en mótrökin voru einkum að það þýddi ekki að láta fólk fara "hálfa leiðina á Þingvöll". En tenging í jaðri byggðar hefur í raun vinninginn líka á vegtæknilegum forsendum. A: Beygt af fyrirhuguðum mislægum gatnamótum við Hafravatnsveg í átt að miðbænum, keyrt meðfram Brúarlandi, ekið í stokk undir Vesturlandsvegi, um Álafosskvos, upp brekkuna fyrir ofan Kvosina og inn í Augað, það mældust 40 cm á stækkaðri loftmynd. Ekið allt á 30 km hraða vegna hljóðmengunar og slysahættu. B: Ekið yfir væntanleg gatnamót Hafravatnsvegar, yfir brú á Varmá, í mislæg gatnamót ofan og norðan núverandi Helgafellshverfis og inn í Augað, það mældust 44 cm. Þarna væri ekið að meðaltali þessa vegalengd á 80 km hraða (Vesturlandsvegi 90 km/klst og 50-70 km/klst að auganu). Það munar sem sagt 10% í vegalengd, en þú ert meira en helmingi fljótari á áfangastað sem að jafnar út mun í eldsneytisnotkun. Auk þess sem 30 km/klst umferð í gegnum Kvosina og miðbæinn mun vera meira og minna stífluð um átta leytið á morgnana og spúa yfir íþrótta- og skólasvæðið.

Með úrskurði Skipulagsstofnunar þurfti bærinn að láta vinna skýrslu vegna umhverfismats áætlana. Í þeim lögum er kveðið á um að gera skuli samanburð á milli valkosta. Einmitt á þeim nótum sem að samtökin höfðu barist fyrir og ætluðu að fá áðurnefnda verkfræðistofu til að vinna. Þetta var því fagnaðarefni í sjálfu sér, en hyggnar konur lásu það úr stöðunni að þessu vinnuferli væri ekki treystandi. Enda reyndist ráðgjafafyrirtækið sem vann skýrsluna afskaplega húsbóndahollt. Lét veginn enda í hringtorgi á Vesturlandsvegi samkvæmt einhverjum óljósum bútasaumi, en fylgdu ekki aðalskipulaginu um áframhald tengibrautar um miðbæinn. Við meðhöndlun á tillögum Varmársamtakanna þá skrifar ráðgjafarfyrirtækið þverun Varmár við Álanes á tillögur samtakanna og kemst á þeim forsendum að því að þær hafi meiri umhverfisáhrif og gildi Varmársvæðisins til útivistar fær enga vigt. Á fundi með fyrirtækinu var ítrekað að okkar tillögur gengju eingöngu út á að mislæg gatnamót í jaðri byggðar, ofan og norðan núverandi Helgafellshverfis kæmu í stað tengibrautar um Álafosskvos, en hinsvegar væri gert ráð fyrir safngötu við Álanes á aðalskipulagi og einnig í þriðja áfanga deiliskipulags Helgafellsbygginga og svari bæjaryfirvalda. Þarna tekur fyrirtækið upp sama tón og fulltrúar bæjaryfirvalda um að nota útúrsnúning um þverun Varmár við Álanes sem forsendu í samanburði. Það er alvarlegt mál í ljósi þess að þeim hafði verið gerð grein fyrir inntaki tillagna samtakanna.

Það sem að gerir málið enn sérstæðara er að nýlega fengu samtökin loksins afhentan samning Helgafellsbygginga og Mosfellsbæjar vegna Helgafellsbrautar. Þar er samningur um skiptingu kostnaðar til helminga, milli verktakans og Mosfellsbæjar við byggingu brúar og lagningar safnbrautar yfir Varmá við Álanes. Í tillögum sínum höfðu Varmársamtökin ákveðið að gefa eftir í baráttunni gegn þessari safnbraut við Álanes og einbeita sér að fá tengingu í jaðri byggðar í stað tengingar um Álafosskvos og meðfram Varmá. Að hugsa sér að bæjaryfirvöld og ráðgjafafyrirtækið skuli hafa leyft sér að eyðileggja vitrænan samanburð með þessum hætti og vitandi af uppáskrifuðum samningi um verkið í skúffunni. Fyrrverandi bæjarstjóri sagði Varmársamtökin vilja fara með brautina í "gegnum Reykjalundarskóg" til að ná að rugla umræðuna og forseti bæjarstjórnar kannaðist ekkert við að þetta væri á aðalskipulagi og reyndi að ná í tromp út á að bendla þessa hugmynd við Varmársamtökin. Vonandi vita bæjaryfirvöld af þessum samningi og geta viðurkennt að búið var að hnýta allt áður en deiliskipulagsvinnan fór af stað. Sennilega áttu bæjarbúar aldrei val eftir að blekið hafði þornað á samningnum við verktakann. Því hafa grimmir hagsmunir fjármagns og verktaka gefið af sér meiri hörku í samskiptum við íbúa heldur en áður hefur þekkst. Á nýju ári verður gengið frá gerð miðbæjarskipulags. Eitt af því sem ætti að vera lærdómur af ágreiningi síðasta árs er að nauðsynlegt er að hafa kynningu og hugmyndavinnu opna og lýðræðislega. Ásamt því að fara nógu snemma af stað þannig að allir aðilar séu með einhver spil á hendi.

Kærleikur

Kærleikurinn er langlyndur, hann er góðviljaður. Kærleikurinn öfundar ekki. Kærleikurinn er ekki raup-samur, hreykir sér ekki upp. Hann hegðar sér ekki ósæmilega, leitar ekki síns eigin, hann reiðist ekki, er ekki langrækinn. Hann gleðst ekki yfir óréttvísinni, en samgleðst sannleikanum.  Hann breiðir yfir allt, trúir öllu, vonar allt, umber allt. Kærleikurinn fellur aldrei úr gildi.
                          1. Korintubréf 13:4-8a

Ef þú lumar á gullkorni í texta sem þér finnst hafa meitlaðan boðskap og inntak, þá væri gaman að fá að sjá og njóta. Beina athyglinni að hinu fagra og verðmæta, stóru og smáu, sem lætur hversdagsleikann verða að ævintýri.

GLEÐILEG JÓL

Tíminn og tengslin

Finnst það gera málið enn verra að hinn ungi sonur og fóstursonur skuli valinn til starfa á þessum degi. Á meðan landsmenn undirbúa jólahátíðina á að lauma slíkri ráðningu í gegn. Þann 21. desember er stystur sólargangur og sjálfsagt kjörið að gera myrkraverk á þessum degi. Jafnframt vel útreiknað, að svigrúm á umræðu og svekkelsi er minna en ef þetta hefði verið tilkynnt í byrjun nýárs.

En höldum þessu til haga. Það er brýnt mál fyrir almenning að tryggja sjálfstæði dómsvalds frá framkvæmdavaldi. Æskilegt að samstaða um hvaða bakgrunnur hentar best til starfsins og væntanlega eðlilegt að sérfróðir aðilar setji slík viðmið. Þetta snýst um mannréttindi og jafnrétti. Það er ónotatilfinning sem fylgir því þegar tengslin eru nýtt til að koma einhverjum fremst í röðina og brjóta þannig á hinum. 

Gagnrýna skipun í dómaraembætti