Arfhreinn vindóttur og álóttur

Síðastliðin fimmtán ár hef ég verið að leika mér við ræktun ákveðins litaafbrigðis í íslenska hestastofninum. Fjölbreytileikinn í hestalitum er einstakur og ánægjulegt að þessi verðmæti hafa fengið athygli margra ræktenda síðustu ár. Liturinn minn er vindóttur, að hafa silfurlitað fax og tagl, álóttur, að hafa dökka rönd eftir hryggnum, dekkri haus og fætur, auk þess að hafa "Zebra-línur" eða þverrákir á fótum. Grunnlitur getur verið bleikur, mólitur eða rauður.

Ég hef átt tvo stóðhesta Hrími frá Stafafelli, bleikálóttur vindóttur og Lokk frá Gullberastöðum, móálóttur vindóttur. Þessum hestum paraði ég síðan aftur á móti óskyldum vindóttum merum. Síðan paraði ég síðastlið vor saman meri á fimmta vetri undan Hrími sem heitir Hæra frá Stafafelli og stóðhestsefni á þriðja vetri undan Lokk, sem heitir Toppur frá Stafafelli. Miklar líkur eru á að ná þannig fram arfhreinum vindóttum og álóttum einstaklingum.

Þetta er því svona mendelsk tilraun í erfðafræði sem ég vonast til að klára á næsta ári. Toppur var hjá tólf merum að Svínhóli í Dalasýslu síðastliðið sumar. Ef 3/4 eða fleiri verða vindóttir og álóttir þá eru miklar líkur á að stóðhesturinn sé arfhreinn um þessi einkenni. Bæði Hrímir og Lokkur voru seldir til Austurríkis. Það er því komið þó nokkuð af vindóttum afkomendum "sem ég á" orðið á meginlandinu.

Set hér myndarunu til að sýna hversu fallegt afbrigði þetta er;

Athugasemdir

[Hólmdís Hjartardóttir (IP-tala skráð) 28.12.2007 kl. 23:38]

Glæsilegar myndir

[Baldur Kristjánsson, 29.12.2007 kl. 11:53]

Vá -ég hef átt vindóttan hest og einnig móálóttan (getur það ekki verið?) þetta eru sérstakir hestlegir litir.  Gangi þér vel með þetta og annað. Áramótakveðjur. B.