Besta sultan 2008 - Úrslit á laugardag

Fyrir tæpri viku setti ég upp könnun á uppáhaldssultu bloggara. Nú hafa um 140 manns kosið og er kosningin mjög tvísýn. Rabbabarasulta og bláberjasulta skora mest og eru jafnar með um 21% en þar skammt á eftir koma sólberjasulta og rifsberjasulta.

Frétti fyrir nokkrum dögum að á útimarkaði í Mosfellsdal mæti menn með krukkurnar og fari í keppni um bestu sultuna eða hverjum hefur tekist best upp í sultugerð. Þannig að líkt og Andri Snær bendir á í Draumalandinu þá geta svipaðar hugmyndir komið fram við svipaðar aðstæður á svipuðum tíma.

 

Því er við hæfi að við tilkynnum úrslit úr þessum sultusamanburði á útimarkaði Varmársamtakanna í Álafosskvos um næstu helgi. Bæði ætti að vera hvatning til dáða á þessu sviði. Enn er nokkuð svigrúm til að fara í berjatínslu og sulta.

 

 

Ég er búin að gera sex sultutegundir og er að verða birgur fyrir veturinn. Fyrst gerði ég krækiberja-, sólberja- og rifsberjasultu, en síðustu dagana hef ég bætt við rabbabara-, stikilsberja-, og bláberjasultu. 

Eftir nokkuð mikla leit að réttu sultukrukkunum, þá fann ég þær með rauðköflótta lokinu í mismunandi stærðum hjá Þorsteini Bergmann - Búsáhaldaverslun í Hraunbæ. Deilið með öðrum reynslu af vinnslu úr berjum (sultur, söft, vín). Og að sjálfsögðu að velja uppáhaldssultuna.

Athugasemdir

[Gunnar Rögnvaldsson, 24.8.2008 kl. 23:54]

Það er aldeilis Gunnlaugur. Þetta er flottur árangur, og svo sólber líka! Til hamingju með þetta.

Við sultum einnig hér í DK ég og konan. Mest rabbabarasultu og rabbabara deserta, en svo einnig plómumarmelaði og stundum appelsínumarmelaði. Ég held mikið uppá rabbabara því hann er svo einstök jurt. Hann er súr, en það er samt hægt að gera hann sætann. Það eru fáar matjurtir sem bjóða uppá bæði súrt og sætt. Ég sakna bláberjanna og þá sérstaklega þeirra íslensku því þau eru svo einstaklega bragðmikil.

Eg ég væri bóndi á Íslandi þá myndi ég hafa stóra akra af rabbabara, og flytja hann sem fullunna rétti út til útlanda sem rándýra vistvæna hágæðavöru undir einhverju óðals eða goðafræðinafni. Það er nefnilega hægt að þróa rabbabrann mikið vegna hinna súru hæfileika hans.

Einhver sagði mér að rabbabari hefði upphaflega komið frá bökkum Volgu til Evrópu.

Kveðjur

[Hólmdís Hjartardóttir, 25.8.2008 kl. 00:16]

Hrútaberjahlaup með villibráð er náttúrulega toppurinn

[Íva S. Björnsdóttir (IP-tala skráð) 25.8.2008 kl. 21:20]

Hæ frændi,

á ekki að láta uppskriftir fylgja eða eru þær hernaðarleyndarmál,

ég er búin að gera rifsberjasultu/hlaup en ætla næst að vinna úr sólberjunum, það væri gaman að fá frá þér uppskrift af sólberjasultu

kv. Íva frænka

[Gunnlaugur B Ólafsson, 25.8.2008 kl. 21:33]

Sæll Gunnar - Gaman að heyra af öflugum heimilisiðnaði í Danaveldi og þetta er góð hugmynd sem þú ert búin að koma á framfæri til að auka útflutning frá Fróni. Já, Hólmdís, það er þetta með hrútaberjahlaupið. Ég veit bara ekki hvar maður finnur lendur með nægjanlegu magni af hrútaberjum? Mbk, G

[Gunnlaugur B Ólafsson, 25.8.2008 kl. 23:17]

Halló frænka

Þarna mátaðirðu mig . Ég nota eiginlega sömu uppskrift á öll berin enda er ég nýgræðingur í þessu og að leita að stílbrigðum. Fer örugglega út í einhverjar kúnstir á næsta ári. Hver veit nema að áherslan verði á víngerðina.

Fyrst síð ég berin í um 20 mínútur í potti með smá vatni. Sía síðan hratið frá og set í mixerinn og sía það svo aftur út í. Set síðan hálft kíló af sykri á móti kílói af berjum, ásamt einni skeið að melatin sultuhleypi.

Ég er ánægður með allar sulturnar þó vafalaust hefði mátt hafa fleiri stílbrigði í þessu.

                         Með kærri kveðju,  G

[Hólmdís Hjartardóttir, 26.8.2008 kl. 02:12]

Í allar sultur nota ég 50/50 sykur og ber. Sýð allt saman stutta stund.

Gulli hrútaberjastaði þekki ég bara norðanlands.

[Íva S.Björnsd. (IP-tala skráð) 26.8.2008 kl. 09:16]

Bestu þakkir,

Skelli mér í sólberjasultugerð í kvöld.

Já það er örugglega gaman að prófa sig áfram með víngerð, ég man að pabbi gerði einhvern tímann krækiberjavín, man reyndar ekki hvernig tókst til með það

kv. Íva frænka