Sannleikur er sagna bestur

 

 

 

 

 

 

Skipulagsfulltrúi Mosfellsbæjar hallar verulega réttu máli þegar haft er eftir honum í Morgunblaðinu í vikunni að hin breiða og malbikaða göngubraut sem verið er að leggja meðfram Varmá komi hvergi nær henni en 16 metrar. Hinsvegar segi ég í sömu frétt að "göngustígurinn" komi í allt að 1-5 metra fjarlægð. Á meðfylgjandi myndum sést vel hvor er nær sannleikanum. Það sást reyndar strax í mynd sem RAX hafði tekið fyrir Morgunblaðið af göngubrautinni í átt að Álafossi. Ekki veit ég hvað embættismanni gengur til með því að fara svona frjálslega með staðreyndir.  Reyndar höfum við mátt búa við þetta ástand að skilin milli pólitísks áróðurs og upplýsinga frá embættismönnum bæjarins hafa oft á tíðum orðið óljós og er það óásættanlegt. Það á að vera hægt að treysta því að einungis séu settar fram réttar tölulegar upplýsingar og staðreyndir um gang framkvæmda. Farið er fram á að skipulagsfulltrúinn leiðrétti þessi ummæli, því hann er að gera Varmársamtökin ótrúverðug að ástæðulausu.

 Í áðurnefndri frétt segir hann einnig að Umhverfisstofnun hafi ekki gert athugasemdir við þennan stíg og stofnunin eigi að gæta verndarhagsmuna. Þannig gerir hann UST ábyrga fyrir hinni groddalegu útfærlu. Í Morgunblaðinu í dag er síðan frétt þ.s. rætt er við sviðsstjóra hjá Umhverfisstofnun. Hann telur eðlilegt að göngustígur sé um verndarsvæðið og að sjálfsögðu hafa Varmársamtökin og allir verið hlynntir aðgengi að þessu útivistar- og verndarbelti. Síðan er það spurning um hvernig slíkur stígur sé útfærður. Þeirri ábyrgð varpar sviðsstjórinn yfir til sveitarfélagsins eins og eðlilegt er. Þegar hann er spurður um það hvort stofnunin hefði eitthvað við það að athuga að stígur sem að liggur svo nálægt Varmá sé malbikaður, þá vísar hann til greinargerðar með aðalskipulagi Mosfellsbæjar, þar sem um hverfisverndarsvæði segði að stígar skyldu fyrst og fremst vera malarstígar sem væri komið vel fyrir í landinu. Auk þess telur sviðstjórinn það almennt viðhorf að ekki ætti að malbika stíga nálægt ám og vötnum og að sveitarfélög á höfuðborgarsvæðinu hefðu yfirleitt fylgt því viðmiði.

Athugasemdir

[Finnur Birgisson (IP-tala skráð) 23.2.2008 kl. 23:09]

Sæll Gunnlaugur.

Það er rétt og skylt að leiðrétta það sem rangt hefur verið farið með. Sú framsetning, að stígurinn fari hvergi nær ánni en 16 m er ekki frá mér komin, heldur er þar um að ræða misskilning blaðamannsins eða ónákvæmni í endursögn á því sem honum (henni) var sagt í símtali. Ég sagði henni að stígurinn væri næst ánni þar sem hann tengist núverandi stíg við brú yfir Varmá. Ég sagði jafnframt að samkvæmt mælingum á loftmynd væri miðlína hans um 16m frá fossinum og 30 m frá ánni þar sem fjarlægðin væri mest. Þetta var síðan ekki haft rétt eftir í greininni.

Þannig liggur nú í þessu og ég vísa ásökunum þínum um að ég hafi hallað réttu máli og farið frjálslega með staðreyndir til föðurhúsanna. Sömuleiðis dylgjum þínum um óljós skil á milli pólitísks áróðurs og upplýsinga embættismanna.

Svo er það annað mál að haft var eftir þér í umræddri grein að stígurinn væri "í aðeins 1-5 metra fjarlægð frá Varmá og í um 3 metra fjarlægð frá Álafossi." Skuldarðu ekki leiðréttingu á þessari framsetningu, a.m.k. ef trúverðugleiki Varmársamtakanna er í húfi?

[Gunnlaugur B Ólafsson, 23.2.2008 kl. 23:24]

Takk kærlega fyrir þetta Finnur. 3m eða 5m frá fossinum er nú innan skekkjumarka hjá amatör í mælingum, en að segja að stígurinn kæmi hvergi nær en 16 m hjá atvinnumanni  var of mikil skekkja. Já, og því miður upplifði ég það þannig að verið væri vísvitandi að afvegaleiða þarfa umræðu. Tek skýringum þínum en finnst þó nauðsynlegt að Mbl. verði send leiðrétting.

[PUSHKAR PALACE (IP-tala skráð) 25.2.2008 kl. 13:20]

Nirvanakvedjur fra borginni helgu Pushkar a Indlandi thar sem vidskipti og nirvana er blandad saman i heilagann kokteil. Sigrun og Eggert

[Gunnlaugur B Ólafsson, 25.2.2008 kl. 16:27]

Eru tölvusamband við Pushkar! Gott að heyra að allt sé í góðu flæði þarna á Indlandi en skömm áhugamanna um verkefni fyrir þriggja hásinga trukka, ýtur og gröfur inn á verndarsvæði Vármár og við Álafoss er mikil.