Raunveruleikinn er í kálinu

Síðustu tvær helgar hef ég verið þeirrar gæfu aðnjótandi að fá að hjálpa til við kálskurð hjá Helga garðyrkjubónda á Reykjum í Mosfellsbæ. Akurinn er stór spilda fyrir framan húsið hjá mér og þar er mikil ræktun. Ég vona að þessu landi verði ekki breytt í byggingarland. Það er nóg til af hæðum, melum og hólum til að staðsetja byggð. Varðveita það sem er eftir af ræktanlegu landi á höfuðborgarsvæðinu.

Á vorin og haustin fer dráttarvélin rólega framhjá. Minnir mann á að grunnur samfélagsins liggur í fæðuframleiðslu. Reynt er að lámarka þann tíma sem kálið er í geymslu og því er stór hluti þess hafður óskorinn á akrinum eins lengi og hægt er út af veðri. Nú um þessa helgi var spáin orðin þannig að frost og vetur yrðu ríkjandi út vikuna. Því var nú farið í mikla törn og stór hluti af því sem eftir var skorið. Það hafa margir hausar verið látnir fjúka í gær og dag.

Vanalega er týnt upp og flutt í geymslu jafnóðum og skorið er. Nú voru kálhausarnir skornir og snúið við til að verja þá frostskemmdum. Hver röðin afgreidd á eftir annari. Til að halda góðri vinnustemingu er tilvalið að hafa tónhlöðuna með og slatta af orkuríkri suðrænnri músik. Eftir törn gærdagsins brá ég mér á Hvolsvöll og hitti á hluta þeirra pilta og stúlkna sem hittust fyrst í menntaskólanum á Laugarvatni á haustdögum fyrir 30 árum.

Þrátt fyrir að hafa verið í góðri sveiflu inn í nóttina á grundum Suðurlands, þá var ég mættur á kálakurinn upp úr klukkan níu í morgun. Raunveruleikinn er í kálinu og það þýðir ekki að vera með neitt kæruleysi um hábjargræðistímann. Strengir í skrokknum eru hluti af uppskeru dagsins. Við tókum þetta með krafti, svo frostavetur kom þú sæll, ef þú vilt.

Athugasemdir

[Gudrún Hauksdótttir, 20.10.2008 kl. 11:15]

ædislegar myndir...

Man tá tíd er vid systkinin fórum í Smárahvamm sem var stór landareign í Kópavogi og tókum upp rófur ,kál og annad gódgæti.Ad launum fengum vid einn sekk af einhverju.Tetta seldum vid svo til kaupmannsins á horninu  sem var í mínu tilfelli Drífa vid Hlídarveg. oftar en ekki greiddi Jóhann meira en lög gerdu rád fyrir fyrir góssid.

Núna er Smárahvammur horfinn og Smáralind liggur á landareigninni.

Eigdu gódann dag.

[Gunnlaugur B Ólafsson, 20.10.2008 kl. 12:25]

Takk fyrir það og sömuleiðis. Andri Snær hefur mikið fjallað um hugmynda manna um raunveruleikann og áliðnað. Þannig að mér fannst rétt að benda á að raunveruleikinn liggur í kálinu. Að framleiða matvæli er ekki aukaatriði heldur aðalatriði. Ljóstillæfandi lífverur skapa lífsgrundvöll fyrir okkur öll. Mbk,  G

[Gudrún Hauksdótttir, 20.10.2008 kl. 12:31]

Tar er ég sko alveg sammála  og gód skýring  hjá tér

[Úrsúla Jünemann, 20.10.2008 kl. 16:07]

Mér finnst alveg æðislegt að fara hér í Mósó til grænmetisbónda og kaupa brakandi ferskt grænmeti á góðu verði. Vonandi verður þessi starfsemi sem lengst.

[Anna Dóra Garðarsdóttir (IP-tala skráð) 20.10.2008 kl. 20:46]

Já það er notarlegt að fara og kaupa ferskt grænmeti. Hef alltaf taugar til staðarins frá því í den tid.

[Gunnlaugur B Ólafsson, 20.10.2008 kl. 23:42]

Sæl Úrsúla - Þetta tengist einhverjum góðum hlutum sem að er sennilega hluti af því að vera manneskja eða bara lífvera. Álíka og að hlusta á nið lækjarins gefur góða tilfinningu fyrir mig á rölti úti í náttúrunni. Fuglarnir okkar fara líka alltaf að syngja þegar vatn er látið renna úr krananum. Þessi nauðsynlegu tengsl við grunnelement lífstarfseminnar gefa ánægju. Mbk,  G