Sæluhúsið á Jólatorgi í Mosfellsbæ

Við jólatréð á nýju bæjartorgi í Mosfellsbæ hefur verið komið fyrir nokkrum smáhýsum fyrir markað. Ég ákvað að slá til og verð með eitt hús til styrktar byggingar gönguskála við Eskifell að Stafafelli í Lóni. Bæði í tengslum við tilefni fjáröflunar og þær áherslur sem ég er með í sölunni þá hef ég kallað þetta Sæluhúsið. Þar er heitt kakó með súkkulaði ásamt ýmsum smákökum og brauði með hinum fjölbreytilegustu sultutegundum.

Síðan eru til sölu mannbætandi bækur frá bókaútgáfunni Sölku. Eitthvað af kartöflum og grænmeti, ásamt ávaxtadrykk. Þetta er önnur helgin og fer vöruúrvalið smátt og smátt vaxandi. Ég hef frétt af manni frá Alsír sem að á mikið úrval af silkináttfötum og undirfatnaði. Finnst alveg við hæfi að það væri hluti af sælunni. Síðan hefur listakonan mín lofað að framleiða eitthvað af keramik og einnig eru til sölu sérgerð jólakort með vetrarmynd af Vestra-Horni.

Auk þessa fór ég út í súrkálsgerð. Tæti niður í jöfn lög hvítkálshausa með rifjárni í pott og set sjávarsalt og kúmín fræ á milli laga. Síðan er settur þrýstingur ofan á og leitar þá vökvinn út úr kálinu. Þannig læt ég kálið vera yfir nótt. Síðan set ég hunang og ólifu olíu í botninn á vóg-pönnu. Velti kálinu upp úr þessu smástund og bæti síðan yfir til suðu blöndu af hvítvíni og eplaediki. Að síðustu set ég steiktar skífur af gulrótum og einiber út í blönduna áður en hún fer í krukkur.

Það skiptir öllu að vera að  ....

Athugasemdir

[Ólafur í Hvarfi (IP-tala skráð) 6.12.2008 kl. 18:11]

Ég og Guðbjörg kona mín litum við í sölubásnum hjá Gunnlaugi og fengum heitt Kakó í bland með léttu spjalli, fínasta stemmning sem getur myndast á torginu, tala nú ekki um ef að menn ættu smá Stroh útí ;)

En við keyptum tvær krúsir af súrkáli og smökkuðum á herliheitunum þegar heim var komið og namm namm, bara alvarlega gott, önnur krúsin tæmdist strax og seinni verður með kvöldmatnum.

Mæli með súrkálinu, bæði ódýrt og gott.  Kem síðan sjálfur og kaupi meira.

[HP Foss, 6.12.2008 kl. 19:41]

Já, ég væri til í að smakka þetta súrkál. Hvernig bragð er af þessu?

Helgi

[Gunnlaugur B Ólafsson, 6.12.2008 kl. 22:34]

SÆLUHÚSIÐ -Silki og súrkál-  Hvernig hljómar þetta sem slagorð?

Gott Óli að þetta smakkaðist vel. Helgi þetta er hvítvín/edik í grunn fyrir utan náttúrulega bragðið af kálinu. Síðan eru gulrætur saman við. Einiber eru líka og gefa stöku rammari tón á móti súra, einnig gefa kúmín fræin (algeng í indverskum mat) sinn karakter í þetta, vona ég.