Auðurinn er í ullinni

Eftir bankahrun leitar athygli í eldri bjargræði þjóðarinnar. Ein er sú afurð sem vissulega væri hægt að selja í skipsförmum. Það er íslenska lopapeysan í sauðalitum með klassísku mynstri.

Jafnvel mætti framleiða líka fingravetlinga. Ragnhildur amma mín seldi áratugum saman vetlinga með stjörnu í Rammagerðina. Prjónaveldi hennar skapaði henni fjárhagslegt svigrúm.

Hún útbjó stroffið í prjónavél og man að ég hjálpaði henni eitthvað við að græja til vélina þegar sjónin var farin að daprast. Hún sagði í fullri alvöru; "Gulli minn þú ættir að kaupa þér prjónavél".

Henni var annt um efnahag minn og sá þarna leið sem myndi tryggja hann til langrar framtíðar. En á þessum árum var staðan metin þannig að ég myndi ekki skora nein stig með því að segjast eiga prjónavél. En nú stendur mér nok á sama um ímynd karlmennskunnar. Viðurkenni fúslega að ég hef gaman af Mama mia og væri alveg til í að eiga prjónavél í bílskúrnum.

 

Athugasemdir

[Hólmfríður Bjarnadóttir, 10.2.2009 kl. 10:08]

Það er mörg matarholan og þetta er ein þeirra. Er þessa dagana að hanna uppskriftir af prjónuðum pylsum sem hægt er að prjóna í tvinnuðu ullarbandi í sauðalitunum. Ef pylsin seljar svo ekki, er alltaf hægt að gefa þau gömlum konum í Bretlandi, þeim er svo kalt eins og við vitum núna.

Þetta með prjónavélina er bráðsnjöll hugmynd.

[Lára (IP-tala skráð) 10.2.2009 kl. 13:41]

Þetta eru  glæsilegir fingrvettlingar  sem að  myndin er af.   gaman hefði ég að spreyta mig á að prjóna slíka vettlinga ..   skemmtilegt  útspil hefði verið hjá þér að skella uppskriftinni með  pistlinum .

[Brynjar Jóhannsson, 10.2.2009 kl. 15:07]

Það var útfluttningur á íslenskum fata iðnaði þegar krónan var sterk og myndi halda að möguleikar fyrir útflutnningi á fötum sem eru framlend hérlendis raunhæfari en nokkurn tíman áður.

[Gunnlaugur B Ólafsson, 10.2.2009 kl. 19:17]

Gaman að heyra af pilsframleiðslu þinni Hólmfríður og gangi þér vel með það! Lára þetta eru vettlingar sem amma prjónaði og hef ég ekki uppskrift. Finnst e.t.v. líklegt að hún hafi fengið hana annars staðan frá. Allavega hef ég séð svipaða stjörnu á handarbaki, en reyndar ekki með mynstri lófanum. Já, Brynjar nú þurfum við að leggja áherslu á veiðar, vinnslu og framleiðslu á vörum. Það verður að skapa slík störf því allt er betra en að borga fólki fyrir að gera ekki neitt. Við þurfum að vera tiltölulega snögg að skipta um hugarfar. Til dæmis eru um 30% nema í bóknámi framhaldsskóla að eyða tímanum til lítils. Gætu fundið sig í verklegum og framleiðslutengdum störfum.