Einungis fjórðungur landsmanna á móti aðildarviðræðum

Samkvæmt skoðanakönnun Gallup eru 61.2% landsmanna afgerandi hlynnt því að sótt verði um aðild að sambandi lýðræðisríkja í Evrópu, en 26,9% á móti. Þeir sem að taka ekki afstöðu eru 11,8%. Ef skoðaðar eru tölur í undirskriftasöfnunum með (www.sammala.is) og á móti (www.osammala.is) þá eru þrefalt fleiri sem vilja aðildarviðræður.

Þetta er mikilvægt mat á vilja landsmanna fyrir þingmenn þegar þeir gera upp hug sinn í þessu máli nú á sumarþinginu. Meirihluti allra flokka nema Sjálfstæðisflokks vill aðildarviðræður. Þar er þó innan við helmingur (48%) á móti aðildarviðræðum en stuðningsmenn litlu færri (41%). Guðbjörn Guðbjörnsso lýsir í færslu á sinni síðu hvernig gömlu valdaklíkunni í flokknum tókst að loka á þetta mál og ná fram andstöðu flokksins á landsfundi. Telja má líklegt að margir kjósenda flokksins séu því ósjálfstæðir í þessu máli og lúti flokkslínunni.

Það er vissulega til umhugsunar að svo virðist sem Bjarni Benediktsson hinn nýi formaður Sjálfstæðisflokksins sé að hóta því að beitt verði flokksaga og spillt fyrir þessu máli. Að flokkurinn muni ekki "losa ríkisstjórnina úr snörunni" í þessu máli. Hann segir líka; „Það má vel vera að menn í flokknum hafi ólíkar skoðanir en það eru allir sammála um að það sé óskynsamlegt að veita umboð sem gengur út á það að Samfylkingin fari til Brussel og semji um aðild Íslands að Evrópusambandinu."

Það er vitað að stuðningur við aðildarviðræður er mikill í öllum flokkum og því verður málið prófsteinn á virðingu Alþingis og hvort þingmenn fylgi eigin samvisku í umræðum og afgreiðslu þess. Vitað er að þingmeirihluti er fyrir því að hefja aðildarviðræður og þeir þingmenn sem að óttast refsivönd fyrrum einvalds Davíðs Oddssonar eða trúa á algilda visku Hjörleifs Guttormssonar frænda þá geta þeir sótt styrk til meirihluta þjóðarinnar.

Það er því eðlilegt að sýna landi og þjóð hollustu og reyna ekki frekari skemmdarverk á lýðræðislegri framvindu málsins.

61,2% vilja aðildarviðræður

Athugasemdir

[Árni Gunnarsson, 7.5.2009 kl. 10:30]

Verst er að fólk skuli ekki skilja muninn á umsókn og aðildarviðræðum. Til þess að viðræður um aðild verði settar í farveg þarf fyrst að sækja um aðild.

Þessi skoðanakönnun sýndi að naumur munur er á milli þeirra sem vilja sækja um aðild og hinna sem vilja það ekki. Þeir sem vilja aðildarviðræður eru hinsvegar 61,2%. Það er lágmark að þeir sem gera skoðanakönnun skilji um hvað málið snýst. 

En auðvitað kemur það sér betur fyrir þá sem reka sterkan áróður fyrir málinu að svona var spurt. 

[Haraldur Hansson, 7.5.2009 kl. 10:33]

Einungis 55% landsmanna á móti umsókn um aðild.

Já þær eru skrýtnar þessar skoðanakannanir. Án þess að geta lítið úr niðurstöðu þessarar þá er óneitanlega áhugavert að bera saman niðurstöður síðustu kannana.

Ef spurt er:
A - Viltu að Ísland fari í aðildarviðræður við ESB?
Segir meirihlutinn JÁ.

Ef spurt er:
B - Viltu að Ísland sæki um aðild að ESB?
Segir meirihlutinn NEI.

Til þess að geta hafið viðræður þarf fyrst að sækja formlega um aðild. Það er ekki hægt að virða vilja meirihluta A nema ganga gegn vilja meirihluta B. Lýðræðið getur stundum verið klemma. Það eru spennandi og skemmtilegir tímar framundan, eins og einhver orðaði það.

[Gunnlaugur B Ólafsson, 7.5.2009 kl. 10:58]

Ég held að þið séuð að gera of mikið úr þessum blæbrigðum í orðalagi. Það var lengi meirihluti fyrir umsókn og viðræðum samkvæmt könnunum samtaka iðnaðarins. Síðan fór þetta aðeins til baka í kringum búsáhaldaóróleika og andstöðu landsfunda D og V. Síðan fékk málið verulega aukinn þunga í síðustu vikunni fyrir kosningar. Nú er meirihluti fyrir umsókn og aðildarviðræðum meðal þings og þjóðar. Það er mín upplifun og sannfæring. Mbk, G

[Árni Gunnarsson, 7.5.2009 kl. 11:36]

Skarpur maður eins og þú Gunnlaugur mátt bara ekki tala um upplifun í þessu máli. Það er alveg augljóst að fólk hefur misskilið þetta. Sjálfum finnst mér grábölvað að viðurkenna ég er einn úr þeim hópi sem misskildi þennan fjanda allt þar til í gær.

Þessi lágmarksþekking á afdrifaríku máli er greinilega ekki fyrir hendi hjá miklum fjólda fólks.

[Hans Haraldsson (IP-tala skráð) 7.5.2009 kl. 15:37]

Hvað sem líður þinni upplifun og sannfæringu Gunnlaugur þá voru gerðar tvær kannanir með stutt millibili í febrúar og mars. Önnur var á vegum SI og var spurt um aðildarviðræður og mældi svipaðan meirihluta fylgjandi og nú (64,2%). Hin var á vegum fréttablaðsins og var spurt um umsókn og mældi meirihluta á móti (53,4%).

Í þessari frétt af eyjunni má sjá niðurstöður úr báðum.

[Árni Gunnarsson, 7.5.2009 kl. 16:24]

Mér gremst reyndar hversu mikil orka og miklir fjármunir fara í þessar deilur um aðildarviðræður/aðildarumsókn. Mín sannfæring er sú að þegar niðurstöður aðildarviðræðna- ef af þeim verður- liggja fyrir þá muni þjóðaratkvæðagreiðsla leiða í ljós að samningnum verði hafnað með miklum meirihluta.Og þessi spá mín er ekki bundin neinni óskhyggju því ég óttast ekki hætis hót niðurstöðurnar.

En af hverju var ekki farið í samningaviðræður um annan gjaldmiðil ef allir eru sannfærðir um sekt krónunnar í þessari efnahagskrísu?

Ef gjaldmiðill getur haft vit fyrir heimskri hagstjórn verðum við auðvitað annað hvort að skipta um gjaldmiðil eða skipta um fólk við hagstjórnina.

[Hjörtur J. Guðmundsson, 7.5.2009 kl. 19:46]

Það hefur aldrei mér vitanlega verið spurt að því í skoðanakönnunum fyrir Samtök iðnaðarins hvort sækja eigi um aðild að Evrópusambandinu, aðeins hvort hefja eigi aðildarviðræður við sambandið sem margir upplifa vafalaust sem mun saklausari og skuldbindingalausari aðgerð.

[Gunnlaugur Ingvarsson (IP-tala skráð) 8.5.2009 kl. 09:05]

Sæll nafni. 

Þessi skoðana-hönnun sem aðeins spyr hálfra spurninga og reynir svo staðfastlega að fela það að til þess að fara í aðildarviðræður þá þyrftum við fyrst að sækja formlega um aðild að ESB apparatinu er svona álíka vetleysislega unninn eins og að ef þú Gunnlaugur B. Ólafsson hefðir lýst því formlega yfir meðal allra íbúa Mosfellsbæjar, sex mánuðum fyrir síðustu kosningar að þú hygðist fara í framboð til Alþingis í næstu Alþingiskosningum.

Þú segðir ekkert frá því fyrir hvaða málum þú hygðist sérstaklega beita þér fyrir, hvað þá hvort þetta væri á þínum vegum eða þú hygðist fara fram fyrir einhvern af stjórnmálaflokkunum.

Síðan þegar þessi yfirlýsing þín hefði fengið rækilega umfjöllun á öllum helstu fréttamiðlum bæjarins hefðu helstu stuðningsmenn þínir látið gera sérstaka skoðanakönnun (hönnun) meðal íbúa Mosfellsbæjar til að nota í áróðursskyni fyrir þetta framboð þitt.

Spurningarnar hefðu verið í anda þessarar ESB skoðanahönnunar en þær hefðu verið einhvern veginn svona:

"Nú eru Alþingiskonsingar að vori og sá víðkunni Mosfellingur Gunnlaugur B. Ólafsson hefur gefið út yfirlýsingu að hann hyggist leita eftir stuðningi við framboð sitt til Alþingis, ert þú sem Mosfellingur tilbúinn til þess að íhuga að styðja framboð hans og jafnframt efna til opinna samræðna við hann um hagsmuni og framgang Mosfellsbæjar".

Ég er alveg viss um það nafni minn að svona aktívur og ágætlega kynntur Mosfellingur eins og þú hefðir fengið alveg bullandi jákvæðar vitökur bæjarbúa í þessari skoðanahönnun vina þinna.

Þeir hefðu síðan getað slegið því uppá öllum forsíðum fréttamiðla bæjarins með flenni stórri mynd af kappanum sjálfumvið blaktandi fána bæjarins í baksýn að 61,2% allra bæjarbúa hefðu lýst yfir að styðja framboð þitt og óskað jafnfarmt eftir sérstökum viðræðum við þig um sérstök hagsmunamál bæjarfélagsins.

Þetta heitir að misbeita valdi fjölmiðla og beita skoðanahönnunum til þess að hanna atburðarrás sem er hagstæð tilteknum öflum og tilteknum málstað.

Þegar í ljós hefði síðan komið að til þess að eiga þessar opnu og  hreinskiptu viðræður við frambjóðandann Gunnlaug B. Ólafsson hefðu allir þessir 61,2% Mosfellinga fyrst þurft að sækja um að fá að ganga í Samfylkinguna, fyrr hefði hann ekkert við þetta fólk að tala.

Þá er ég nú ansi hræddur um að það hefðu runnið tvær grímur á margan Mosfellingin og sumir jafnvel móðgast illilega.

En tilgangurinn helgar ESB meðalið !