"Ég er ekki skotinn í stelpum"

Strákarnir mínir tveir hafa báðir verið á frábærum leikskóla hér í Mosfellsbæ. Sérstaklega gott starfsfólk og þeim hefur líkað þar vel. Skólinn rekur starfsemi sína í anda Hjallastefnunnar. Eitt af þeim atriðum sem kenningar hennar ganga út á er að það sé æskilegt að hafa kynin að mestu aðgreind.

Við bjuggum í Bandaríkjunum fyrir nokkrum árum og þá var eldri strákurinn fjögurra ára og hann átti vinkonur í leikskólanum þar og við buðum þeim jafnt og strákunum í barnaafmæli. Það var bara sjálfsagt og eðlilegt. Í framhaldi kemur hann aftur í þessa kynaðgreiningu sem að á að gera stelpurnar ákveðnar og sjálfstæðar, strákana mjúka og samvinnuþýða.

Nú er hann fjórtán ára en fram að tíu ára aldri voru stelpur meira og minna óæskilegur kynstofn sem lítil eða engin samskipti voru höfð við. Það er mitt álit að þessi neikvæða afstaða til stelpna hafi verið út af þessari aðgreiningu kynjanna. Strákarnir voru líka síður en svo mjúkir, gengu milli húsa með byssum og sverðum. Veit ekki hvort þessi stefna bjó til ákveðnari stelpur.

Nú er yngri strákurinn farin að spá töluvert í hvað felist í því að vera strákur og stelpa. Hann talar mikið um að hann langi að eignast systur. Mamman er eina daman á heimilinu og hann langar greinilega að eiga meiri samskipti við stelpur. En tekur jafnframt skýrt fram að hann sé ekki skotinn í stelpum.

Ég er ekki sannfærður um aðgreiningu kynjanna samkvæmt Hjallastefnu. Finnst að kynin eigi í aðalatriðum að vera saman sem eðlilegur hluti af undirbúningi fyrir heilbrigði í samskiptum. Hinsvegar getur verið æskilegt að hafa stráka og stelputíma, til að vinna gegn einhverjum staðalímyndum.

Athugasemdir

[Dísa (IP-tala skráð) 10.11.2007 kl. 10:34]

Alveg er ég sammála þér, á 2 stelpur og 1 strák, stelpurnar eru 12 og 14 ára og þær eru sko ákveðnar og engin lömb að leika við í þeim skilningi að það veður engin yfir þær og vita hvað þær vilja, metnaðarsamar og já ánægðar með sig. Drengurinn er orðin 11 ára og alveg jafnyndislegur en eins og þú segir, hann kemur ekki nálægt bekkjarsystrum sínum og vill yfir höfuð t.d. alls ekki leika við stelpur, eins og það var eðlilegt þegar ég var krakki að allir léku saman. Eins og ég var hrifin af Hjallastefnun og er að vissu marki, þá hef ég oft hugleitt þetta, en aldrei heyrt neinn annan ræða þetta og sniðugt að gera könnun meðal barna á þessum aldri og ég held að það sé sláandi munur á milli drengja og stúlkna, hef verið að spekúlera í þessu lengi og tek einmitt oft eftir þessum einkennum. Góða helgi.

[Hrönn Sigurðardóttir, 10.11.2007 kl. 11:28]

Hef oft spáð í Hjallastefnuna. Hún hefur náttúrulega eins og aðrar stefnur, kosti og galla. Eitt finnst mér vanta til að fylgja stefnunni alla leið og það er að fóstrurnar á strákadeildunum séu karlmenn! Held að til þess að stefnan skili sér alla leið hljóti sá sem ræður á deildinni að þurfa að vera sama kyn.

Annars sýnist mér strákar kerfisbundið brotnir niður um leið og þeir koma í skóla. Strákar eru hávaðasamari, slást meira og það fer meira fyrir strákum, á meðan stelpur hvíslast á og skilja út undan. Sé ekki að Hjallastefnan hafi breytt neinu um það.

[Einar Bragi Bragason., 10.11.2007 kl. 11:54]

Ég er sammála þér með þessa hjallastefnu...hef aldrei verið hrifinn af svona

[Gunnlaugur B Ólafsson, 10.11.2007 kl. 13:53]

Já, það er spurning hvort hægt sé að gera könnun hvort að Hjallastefnan er að skila árangri með aðgreiningunni. Hvort stelpur njóti hennar eitthvað meira en strákar og hvort að hugsanlegt sé að þessi áhersla dragi úr samskiptahæfni milli kynja hjá krökkum á vissum aldri.

[Inga María, 11.11.2007 kl. 11:04]

Aðgreining af öllu tagi er mér á móti skapi... en með stefnunni ættu stelpurnar að verða meira spennandi...frá Mars. Hlakka mikið til að sjá þann eldri þegar hann verður komin með kærustu já eða kærustur...held að það verði yndisleg sjón því hann er algjör herramaður!