Ánægjulegt áreiti

 

Línan milli ánægjulegs daðurs og óþægilegs áreitis getur verið hárfín. Ljósmyndin "Amerísk stúlka á Ítalíu" undirstrikar þetta flókna samspil kynjanna. Hún hefur oftast verið notuð til að setja í neikvætt samhengi það áreiti sem að konur verða fyrir. Rætt er við amerísku stúlkuna á myndinni í Morgunblaðinu í dag. Hún segist hafa skemmt sér konunglega við þessa athygli. Það er því eins gott að karlarnir haldi áfram að veita konum athygli, en lesa aðstæðurnar rétt. Hvað sé viðeigandi og hvað ekki. Sumar konur myndu vilja slíka athygli en aðrar upplifðu slíkt óþægilegt og í ætt við ofbeldi. Mannlífið er margslungið. 

Athugasemdir

[Dagbjört Jónsdóttir (IP-tala skráð) 1.3.2008 kl. 14:18]

"Áreiti" er það sem nefnt er á ensku "stimulus", og merkir breyting á innri eða ytri umhverfisþáttum og hefur með skynjun að gera, og er yfirleitt jákvætt fyrirbæri, samanber kynferðislegt áreiti, eða örvun líkamans - sem er forsenda alls kynlífs og ánægjunnar af því.

"Áreitni" er líklega það sem þú varst að ýja að, og er óþægileg og ofbeldisfull hegðun, þar sem abbast er upp á manneskju og henni sýnd vanvirðing. Kynferðisleg áreitni er því langt í frá það sama og ofangreint áreiti, og þess vegna er ruglingurinn ekki léttvægur, heldur stóralvarlegur .

Það sem veldur mörgum misskilningi er að sögnin "að áreita" gæti átt við bæði tilfelli, "áreiti" og "áreitni".

Ég vildi bara breiða út orðið, þar sem allir virðast falla í þessa gildru.

[Gunnlaugur B Ólafsson, 1.3.2008 kl. 15:25]

Takk fyrir Dagbjört, ég er ekki að falla í neina gildru. Hef lært það mikið í sálvísindum og skilyrðingum, virkum og klassískum að ég veit allt um merkingu þessara hugtaka. Stóra málið er að þarna er svo erfitt að alhæfa. Sama áreitið blístrandi ítalskir karlar á götu geta ýmist vakið ánægjutilfinninguna "vá, hvað þeim fannst ég flott" eða óttatilfinninguna "bölvaðir ruddar eru þetta". Viðbrögðin ráðast fyrst og fremst af skilningi og reynslu. Það er sem sagt ekki hægt að ákveða neitt út frá áreitinu eða atferli karlana, heldur ráðast viðbrögðin út frá huglægum mælistikum. Það fannst mér áhugavert í þessu samhengi og undirstrikar að tilveran er margslungin og skemmtileg.

[Hrönn Sigurðardóttir, 1.3.2008 kl. 18:36]

Það er nefnilega svo misjafnt hvar mörkin liggja....

....það er það sem mér finnst svo áhugavert. Það er eins með eineltið og áreitið. Það sem einum finnst saklaus stríðni tekur ekkert nærri sér - finnst öðrum erfið reynsla og grætur undan.

Ég segi nú fyrir mig að mér finnst alltaf gaman að vekja athygli. Hvort sem er fyrir einelti eða áreiti

Eigðu góða helgi. 

[Dagbjört Jónsdóttir (IP-tala skráð) 1.3.2008 kl. 20:16]

Já, þetta er margslungið, það er satt, og biðst ég afsökunar á að hafa talið þig meðal þeirra sem ekki gera greinarmun á þessum hugtökum. Ég hafði nefnilega séð aðra tilvísun í þessa frétt þar sem viðkomandi notaði sitt á hvað "áreiti" og "áreitni" eins og enginn væri munurinn á.

[Gunnlaugur B Ólafsson, 1.3.2008 kl. 20:18]

Unglingurinn á heimilinu, sem mér finnst vera mjög flottur, með sérlega fallegt rautt hár, sagði mér um daginn að hann þyrfti á hverjum degi að taka einhverjum glósum tengt því að hann sé rauðhærður. Hann er með nógu gott sjálfstraust til að taka því. En þar að auki segir hann að í skólanum sé sérstakt félag gegn rauðhærðum.

Svona hlítur að verða að óþægilegu áreiti, þó menn beri sig vel.

                  Góða helgi sömuleiðis,

                                   daginn lengir og styttist í vorið