Kirsuberjaspáin liggur fyrir

Á jafn fögrum dögum og í dag með birtuna fram undir klukkan átta að kvöldi sýnir að vorið er handan við hornið. Í Washington og hjá mörgum Bandaríkjamanni er innreið sumarsins tengd við þann dag sem að kirsuberjatrén blómstra í miðborginni.

Sérfræðinganefnd skrúðgarðyrkjumanna og veðurspámanna ákveða hvenær líklegt er að hámarksblómgun verði. Spáin fyrir 2008 segir að það verði dagana 27. mars til 3. apríl. Einnig er spáð þegar nær dregur fyrir um þann dag sem mesta blómgunin er að eiga sér stað en það var 4. apríl í fyrra. Mikill fjöldi ferðamanna fer til Washington til að vera viðstaddur "blooming season".

Ég er með kirsuberjatré í garðinum og það blómstraði í fyrra rúmum mánuði síðar en í Washington eða þann 12. maí. Sérfræðingarnir vestra eru búnir að setja blómgun trjánna þar örlítið fyrr en í fyrra, en þá er það spurning hvort ég eigi að spá því að vor og sumar komi fyrr eða síðar hér á okkar ísakalda.

Athugasemdir

[Hrönn Sigurðardóttir, 14.3.2008 kl. 20:27]

æj spáðu fyrr - ég er orðin svo leið á þessu..........

[Gunnlaugur B Ólafsson, 14.3.2008 kl. 20:55]

Hæ Hrönn, þú verður bara að fara til Washington um mánaðamótin. Ég var þar á þessum tima eitt sinn og þá vissi ég ekkert um þetta, en það var frábært að leigja hjól og upplifa þessi sterku tákn þess að sumarið væri komið.

Hafði þann sið í nokkur ár að fara í Apríl í Munaðarnes og að hlusta á Norðurá losna úr klakaböndum. Það stuðlaði að leysingatíð í sálinni.

[Hólmdís Hjartardóttir, 15.3.2008 kl. 00:41]

Sá kirsuberjatré í blóma í London 30. jan sl. Japanskir veðurfræðingar spá fyrir hvenær trén blómstra þar í landi og fá bágt fyrir ef þeir spá vitlaust. Mitt tré hefur blómstrað snemma í maí. Ég spái því að eftir nokkur á sjáum við stæðileg kirsuberjatré hér.