Jón Klisja

 

Mikið er ég orðin leiður á að horfa upp á fýlusvipinn á honum John Cleese út um allt. Hver eru skilaboðin? Maður rekst á Jón sem andlit á hliðarborðum netsíðna, sér hann í sjónvarpinu hvern dag með látbragð sem á að vera fyndið, út í banka er Jón í mannsstærð út á gólfi og á plakötum upp um alla veggi. Eru skilaboðin þau að Kaupþing sé alþjóðlegur banki sem hefur efni á að kaupa dýra erlenda leikara?

Fyrsti viðskiptareikningurinn minn var í KASK á Hornafirði og gengdi því hlutverki að þar voru færðar til bókar greiðslur fyrir þau fáu lömb sem ég átti sem barn og unglingur. Stofnaði svo bók í Búnaðarbankanum þegar leiðin lá í Menntaskólann á Laugarvatni í lok áttunda tugar síðustu aldar. Síðan hefur maður meira og minna fylgt með í gegnum nafnabreytingar og sameiningar.

Man eftir því að einhverntíma upp úr tvítugu var ég á stórdansleik í Sindrabæ á Höfn. Þá var nýlega byrjað að selja áfengi á bar í félagsheimilinu, en ekki lengur þörf á að pukrast með slíkt undir borðum og hugsanlega rennbleyta sig í klofinu við að blanda. Nauðsynlegt að fá sér örlítið í tána til að hafa hugrekki í samskipti við göfugra kynið. Ég fer því á barinn með þykkt veski, sem var þó lítið annað en ávísanahefti, greiðslumáti þess tíma.

Falleg stelpa, með sumarvinnu í Landsbankanum stóð við hliðina á mér. Þegar hún sér mig skrifa á grænt blaðið með sáðmanninum, tákni Búnaðarbankans, segir hún snöggt, um leið og hún sveiflar hárinu; "Ój, ertu í beljubankanum?". Það þótti nefninlega dálítið fínt að vera að vinna í Landsbankanum á Höfn. Afgreiðsludömurnar þar voru þær einu, fyrir utan lögguna, sem gengu um í einkennisbúningum.

Þannig að ég skil af biturri reynslu að ímynd banka skiptir máli, en sagt er að allt fari í hring og er ímynd ræktunarmannsins nokkuð verri en þetta bruðl og heilaþvottur með John Cleese?

Athugasemdir

[Þorsteinn Sverrisson, 27.3.2008 kl. 21:48]

Sammála. Þessar auglýsingar eru hrútleiðinlegar.  En alltaf eftirsjá í sáðmanningum sem var táknrænt og gott logo gamla búnaðarbankans, Traustur banki, eins og kom í ljós þegar Sigurður í Hvítárholti keyrði á útibúið á Flúðum.

[Guðný Anna Arnþórsdóttir, 27.3.2008 kl. 21:54]

Já, JC var fyndnasti maður á jarðríki fyrir 30 árum, en eitthvað hefur breyzt síðan þá .... ellegar hvussu hvums?

[HP Foss, 28.3.2008 kl. 00:08]

Já, þær kunnu að særa okkur sveitamennina, stelpurnar í denn. Svo kom málari að sunnan, þá tóku þær við sér. Uss og svei!

Láttu þetta eins og vind um eyrun þjóta, þær eru svona sumar, gera sér enga grein fyrir því hvaða tjóni þær geta valdið með svona skotum.

kv-Helgi

[Þorleifur Magnús Magnússon. ( Brói ), 28.3.2008 kl. 02:11]

já þetta er dálítið,,," látum hann gera eitthvað fyndið" ´fílingur hjá auglýsingarstofunni. Ekkert þema. Vertu bara fyndinn og berðu á hausinn á íslenska durginum eins og þú gerðir í hótel grínþáttunum sem voru svo fyndnir. Mikið af aurum sem fara í "ekki fyndið"...

[Hrönn Sigurðardóttir, 28.3.2008 kl. 10:17]

Þegar ég loksins áttaði mig á því að táknið fyrir Búnaðarbankann var ekki maður með hönd í fatla, var lógóinu breytt.....

[baun (IP-tala skráð) 28.3.2008 kl. 10:28]

ég tek út fyrir að sjá mína gömlu grínhetju í þessum arfavitlausu og ófyndnu auglýsingum, en reyndar er mér afskaplega illa við bankann minn af mörgum ástæðum

[Ólafur í Hvarfi Ragnarsson (IP-tala skráð) 28.3.2008 kl. 13:32]

John Cleese er einn af mínum uppáhalds leikurum og er ég mikill aðdáandi Monty Python gengisins og leikþátta þeirra.

Í þessu tilviki hefur verið keyptur fyndinn frontur sem virkar ekki af þeirri einföldu ástæðu að Cleese skrifar ekki sjálfur handritið, hann virkar þegar hann skrifar sketsanan sjálfur eins og sést vel í bresku reykingavarnaauglýsingunum sem hann gerði og það með því skilyrði að hann fengi að ráða öllu.  Það eru hreint óborganlega fyndnar auglýsingar og kallinn fer á kostum, engar klisjur þar.

Annars sakna ég smá gamla Búnaðarbankans í Mosó, alltaf vinalegt að koma og heilsa up á sveitungana og staffið i bankanum um mánaðarmótin þegar rekningarnir voru borgaðir, allavega þeir sem maður átti fyrir.

[Carlos Ferrer (IP-tala skráð) 29.3.2008 kl. 14:58]

Það fyrsta sem mér datt í hug, þegar ég sá JC auglýsa fyrir Kaupþing var:

"Við erum svo ríkir að það hálfa væri nóg. Hafiði þetta, au.....ir ykkar!"

Ekki gott að banki geri svo út á "kúlið" að hann hættir að vera traustsins verður. Þeir hafa greinilega gleymt því (eða vissu það aldrei) að bankar eru ekki til skemmtunar.