Fjallmyndarlegar

Í menntaskóla og líffræðinámi hafði ég ekki mikinn áhuga á plöntum. Fannst það hálfgerð forheimskun að læra utanbókar heiti á mismunandi tegundum og ættkvíslum. Síðan hef ég í mörg ár farið með gönguhópa um æskuslóðir að Stafafelli í Lóni. Á þessum ferðum og með aldrinum hef ég fengið meiri áhuga á plöntunum. Það er uppörvandi að sjá útsprungið blóm á leið um mela og móa. Þá vaknar áhugi að vita meira um slíka vini og gleðigjafa.

Til að þekkja plönturnar og líka til að nýta í líffræðikennslu hef ég verið að leika mér að því að taka af þeim myndir. Vélin sem ég hef mest tekið á var stafræn Canon 2.1 sem að fór vel í vasa, en er ekki með mikla upplausn. Í gær ákvað ég að kaupa mér stafræna Canon 400 SLR vél. Þá er komin góð upplausn og möguleikar að skipta um linsur. Einnig er handgrip með aukabatteríi. Slíkt eykur tíma sem hægt er að vera með myndavélina fjarri hleðslu.

Ég er lukkulegur að vera komin með tæki til að taka fleiri plöntumyndir svo ég geti haldið áfram að setja nýjar tegundir á haus síðunnar í hverri viku. Vonandi ykkur og mér til fróðleiks og yndisauka.

Athugasemdir

[Hrönn Sigurðardóttir, 9.4.2008 kl. 16:13]

Til lukku með vélina. Bíð spennt eftir myndum

[Hólmdís Hjartardóttir, 9.4.2008 kl. 20:11]

Hlakka til að sjá afraksturinn.

[Gunnlaugur B Ólafsson, 9.4.2008 kl. 20:41]

Hrönn og Hólmdís, þið eruð nú aðalblómarósirnar! Duglegar að sýna ánægju og áhuga á blómaskreytingum.