Á skóli fyrst og fremst að vera skemmtilegur?

Unglingarnir okkar, sem hafa athyglina í tónhlöðunni, tölvuleikjum, kvikmyndum, tónleikum, böllum, gera það skilyrði að allt sem þau taka sér fyrir hendur uppfylli öll helstu viðmið um skemmtilegheit. Þau eru iðulega ofdekruð eða á að segja spillt, af eltingarleik okkar eftir veraldlegum gæðum og tímaleysi foreldrana til að virkja þau inn í  metnaðarfull verkefni. Þessi kynslóð hefur þó fleiri tækifærum úr að moða en nokkur önnur, sem Ísland hefur alið.

Rótleysi samfélagsins skapar hinsvegar þörfina fyrir endalausar flugeldasýningar tilfinningalífsins. Nemandinn mætir með þær væntingar að skólinn sé með skemmtiefni daginn út og inn. Það að nemendur nái aukinni færni eða skilningi á eðli og fyrirbærum náttúrunnar verður aukaatriði. Á endanum gefum við öll eftir í kröfum og skólinn fer að verða eins og dagvistun. Þannig bendir margt til þess að hlutur raungreina innan fjölbrautakerfisins sé að verða óviðunandi undirbúningur að háskólanámi.

Nú er otað að stórum hluta ungmenna tækifærum sem þau nýta sér ekki. Allur útbúnaður í húsnæði og tækni til kennslu er til fyrirmyndar. Á háskólastigi eru fjöldi greina í raunvísindum, verkfræði, heilbrigðisvísindum og íþróttafræðum þar sem færni og þekking í raungreinum kemur að góðum notum. Nemar hafa aftur á móti tilhneigingu til að safnast fyrir í félagsgreinum af því að þær eru sagðar léttar og skemmtilegar. En á sama tíma eru þau búin að fækka tækifærum til háskólanáms.

Sveitungar mínir Kvískerjabræður náðu einstakri færni í tungumálum og náttúruvísindum í mikilli einangrun með útvarp og bækur sem einu kennslutækin. Í kyrrð og þögn sveitabúskaps var það umbun allri annarri æðri að ná betri tökum á lærdómi af ýmsum sviðum. Það var nægjanleg skemmtun ein og sér að skilja ferðir farfugla eða framgang jökla. Þeir bjuggu sér til tækifæri úr engu.

 

Athugasemdir

[Elín G. (IP-tala skráð) 18.4.2008 kl. 21:38]

...ágætar pælingar. Ætlaði annars bara að kasta á þig kveðju og hlakka til að þramma um landið undir þinni leiðsögn í sumar:)

[Jón Aðalsteinn Jónsson, 19.4.2008 kl. 13:21]

Svo eru lika til greinar sem eru öllum gleymdar en skap þó ekki síður grunninn undir lífsafkomu okkar það eru greinar sem kallaðar eru iðngreinar ekki satt

[Róslín A. Valdemarsdóttir, 19.4.2008 kl. 17:15]

Margt get ég sagt þér.

Bóklegur lærdómur í grunnskólum fer hækkandi, og gæti á næstu árum tekið yfirvöldin af öllu verklegu efni.
Athyglina fá verklegu fögin, þar sem við unglingarnir verðum að fá að gera eitthvað skapandi inn á milli.
Félagslíf skiptir líka máli, á meðan manni líður vel er mikið meiri möguleiki á því að maður læri vel og muni það sem maður á að læra.
Skólaböll hafa alla sína tíð átt sér einhvern stað, þú hefur eflaust einhverntíma verið á skólaböllum þegar þú varst á efsta stigi í grunnskóla og þegar þú varst í framhaldsskóla. Þessir lifir setja skólalífinu lit, þar sem unga fólkið hefur eitthvað til að hlakka til, og gera sem best í að finna skemmtiatriði og annað slíkt.
Ég skemmti mér yfirleitt í skólanum, en ég er búin að setja mér mín markmið fyrir lífið, mig langar til að læra margt og margt í skólanum tengist engan vegin því sem ég ætla að verða.

[Gunnlaugur B Ólafsson, 19.4.2008 kl. 23:51]

Elín Það væri ekki síður ánægja fyrir mig að arka með ykkur Bjarna yfir hóla og hæðir, um gil og gljúfur í góðra manna hópi.

Jón Mikið rétt. Ef til vill er staða iðngreina og minnkandi vægi á raungreinar hluti af sama vandanum. Þetta á allt að vera svo huggulegt og þægilegt teboð og hátt hlutfall nema í fjölbrautakerfi framhaldsskóla leitar í félagsgreinar bóknáms.

Róslín Alma Það á að vera gaman í skólanum. Ekki spurning. Öflugt félagslíf. En ég held að það megi ekki slá af dýpt, inntaki og kröfum í skólastarfi vegna þess að skólinn eigi að vera skemmtilegur. Menningin hefur síðustu áratugi breyst og gengur út á upplifun augnabliksins, með miklu sjónrænu og tilfinningalegu áreiti. Held að unglingar líkt og aðrir þurfi að þjálfa kyrrð og íhugun, einbeitingu og athygli.  - Gangi þér vel í að vinna að þínu -        

                                                  Mbk,  G