Róum álfíklana!

Skjótt skipast veður í lofti. Í lok júní gerðu spár á Wall Street ráð fyrir að framundan væri yfir 30% hækkun á álverði í heiminum. Meginástæðan væri hátt verð á raforku og erfiðleikar við að finna svæði með nógu áreiðanlegt framboð á raforku. Athygli áliðnaðarins var af þessum sökum á Íslandi. Nú hefur verð á áli hinsvegar fallið um 37% síðan í júlí.

Áframhald uppbyggingar í áliðnaði þarf að fara fram af mikilli yfirvegun. Helguvík, Bakki og stækkun í Straumsvík er alltof djarflega teflt miðað við stöðu á fjármálamörkuðum. Andstaða við slíkar hugmyndir á ekki að hafa meginstoð í umhverfisvernd heldur fyrirhyggju í fjármálum. Það er ekkert vit í því að skuldbinda orkufyrirtæki með opinbert eignarhald meira á þessum sveiflukennda markaði.

Ef þið hittið á Kristján Þór Júlíusson og hans líka, sem heimta að fá nú stærri skammt en nokkru sinni fyrr, innspýtingu, til að viðhalda veislunni, veitið honum hugarró. Segið honum að það sé allt í lagi að ljúka heildstæðu umhverfismati á Bakka og fáið hann til að draga nokkrum sinnum djúpt andann. Felum síðan einhverju ígildi Þjóðhagsstofnunar að gera kalt mat á áhættu okkar.

Afrakstur orkufyrirtækja ríkis og borgar er tengdur álverði. Svo er komið að við getum ekki sett öll eggin í þessa körfu. Við getum ekki haft ríkistryggðan hallarekstur orkuframleiðslu til áliðnaðar í heiminum. Þá fyrst yrði Ísland gjaldþrota

„Höldum ótrauð áfram“

Athugasemdir

[Sigurður Haukur Gíslason, 17.10.2008 kl. 23:12]

Menn tala um álið eins og það sé aðal byggingarefnið næstu hundrað árin. Koltrefjar eru bæði léttari og sterkari en ál og þegar fundin verður upp tækni til að fjöldaframleiða það með ódýrum hætti þá hrinur álverð í heiminum.

Hvað gerir þjóðin þá með öll áleggin í sömu körfu?

[Benedikt Sigurðarson, 18.10.2008 kl. 11:17]

Algerlega sammála þér . . . . heildstæð yfirvegun og mat á öllum hagsmunum, efnahaglegum, félagslegum og umhverfislegum - - með virkri yfirsýn til lengri framtíðar - - verður að fara fram - og í engu óðagoti.

Fleiri egg í álkörfuna . . . . í hasti núna væri ægilegt áfall . . . .

[Rauða Ljónið, 18.10.2008 kl. 13:37]

Sæll. Hvað er framleiðslu verða á áli í dag?

Hvað skilar sér í hagnað á framleiddu tonni þó að verð hafi lakkað um 30%

Hvað hefur verð á áli  oft sveiflast til á síðust 15 árum ? 

Hverjir greiða kostnað verði farið í stækkun hjá Isal ?

Hvaðan kemur það fjármagn ? 

Hvaða áhrif hefur það á þjóðarbúið ?

Kv. Sigurjón Vigfússon                                                     

[Erna Bjarnadóttir, 18.10.2008 kl. 14:19]

Grein Andra Snæs í Fréttablaðinu í dag er skyldulesning.

[Stefán Gunnarsson, 18.10.2008 kl. 19:57]

Skyldulesning!

Guð minn góður, þessi maður er að reyna leika sér af tölum. Það eru ekki eingöngu starfsmenn alcoa, norðuáls, alcan sem njóta launa frá álverum, ýmsir þjónustu aðilar koma þar að. OR skapar ótal fólki atvinnu á góðum kjörum, verkfræði skrifstofur hafa mikla vinnu í kringum þessar virkjannir líka, þeir borga gjöld til sveitafélaga.

Það eins og það sé eitthvað niðrandi að vera verkamaður/iðnaðarmaður í kringum ál iðnað eða orkuiðnað. Segjandi að kaffihúsa drykkja skapi meira fyrir þjóðarbúið heldur en að nýta okkar orkulindir segir mér bara allt um andra snæ sem ég þarf að vita.

 Ég er járnsmiður og hef komið að þessum framkvæmdum og þjónustu við þessa aðila í 16 ár þó ungur ég sé að árum. Þessi fyrirtæki eru traust, þau borga og hugsa vel um sýna, annað en mjög önnur fyrirtæki í td. í ferðaþjónustu osvfr.

Fólk verður bara að vakna hér, að sjálfsögðu eigum við ekki að setja öll eggin í eina körfu en við verðum að nýta þær auðlindir sem við höfum eða við endum öll í vinnu á eitthverju kaffihúsi eða ræstingum á hótelum fyrir laun fæstir sætta sig við.

[Högni Jóhann Sigurjónsson, 18.10.2008 kl. 21:10]

Segiði mér, ætla náttúruverndarsinnar að láta það ganga mótmælalaust að opnað verði á að allskonar bakteríur og vírusar verði flutt til landsins í formi kjöts frá evrópu?

[Ævar Rafn Kjartansson, 18.10.2008 kl. 21:12]

Andri Snær jarðar kjaftæði stjórnmálamanna með þessari grein. Verst hvað stjórnmálamenn geta endalaust þruglað um ávinning Íslendinga af álinu eins og um heilög fræði sé að ræða.

En kanski er að koma að þeim tíma sem að venjulegt fólk fer að taka stjórnmálafroðusnökkum með fyrirvara.

[Hólmdís Hjartardóttir, 18.10.2008 kl. 21:15]

Vonandi kemur lágt álverð í veg fyrir fleiri álver!!!!!!!!!!!