Fegurðin er skuldlaus

Nú er ég kominn í jólafrí frá skólanum. Lokið törn í yfirferð á prófum. Sameiginlegt jólahlaðborð með vinnufélögum í gærkvöldi og tónleikar með Bubba Morthens í Hlégarði í framhaldi. Fór svo í steypuvinnu með félaga mínum, sem stendur í endurbyggingu á hesthúsi og vorum við að til klukkan þrjú í nótt. Það voru því lúin bein og útkeyrt stjórnkerfi sem læddust undir sæng.

Í morgun var svo þessi fallega stilla og heiðskýr himinn. Einn af þessum dögum sem að fá mann til að njóta heiðríkjunnar. Staldra við. Góð tilfinning. Allt svo jólalegt. Stutt þangað til dag fer að lengja. Nokkur öflug vetrarveður í janúar og febrúar. Svo fer að losna um klakabönd til fjalla. Hver dagur hluti af hringrás og um leið nýtt upphaf.

Fyrir tæpri viku hitti ég á ungan mann fyrir utan leikskólann. Mamma hans var inni að ná í stóra bróður. Ég sagði hæ við hann. Hann var svo íhugull á svipinn, en sagði svo af mikilli innlifun og undrun; "Sjáðu tunglið". Það var þessi hreini tónn í röddinni. Fölskvalaus aðdáun, ásamt hæfileikanum til að geta tekið eftir og dáðst að hinu smáa, sem verður oft hversdagslegt.

Ég ákvað í framhaldi að taka mynd af þessu fallega og fulla tungli sem að strákur hafði bent mér á. Það var þarna í mestu makindum yfir Helgafelli og sést á milli trjánna úr garðinum. Núna þegar ég vaknaði í morgun þá smellti ég tveimur myndum af fegurðinni hér í garðinum.

Hjá húsinu sem að við eigum ekkert í lengur ef reiknað er eftir krónu, en við eigum ennþá helminginn í ef reiknað er eftir evrum. Tunglið sem var fullt yfir Helgafelli fyrir viku er i dag hálft yfir Úlfarsfelli. Fegurðin er samt óbreytt og skuldlaus. Reiknast ekki í krónum. 

 

                     

 

 

Athugasemdir

[Þórbergur Torfason, 19.12.2008 kl. 23:16]

Velkominn í jólafríið Gulli.

Ertu nokkuð að gefa færi á þér með þessu Evru kjaftæði?

[Þórbergur Torfason, 19.12.2008 kl. 23:30]

Yndisleg náttúra óspillt af manna völdum, er það fegursta sem finnst í þessum heimi ef frá eru taldar ?????. Hvað væri fullkomnara en ósnortin náttúra af öllu tagi um landið þvert og endilangt.

Hvernig væri nú Gulli að beita þessum skuldsettu krataþingmönnum og ná í eitthvað af þessum moldríku, iðjulausu, útlendingum sem hafa ekkert fyrir stafni og koma þeim í okkar ómetanlegu náttúru.

Mín skoðun er að í stað þess að hugsa bara um að skera niður á bæði borð, væri nær að afla tekna uppí svínaríið. Því miður getur þessi vesælasta ríkisstjórn lýðveldisins ekki hugsað eða framkvæmt fram fyrir nefið á sér svo best er að gleyma öllum svona draumórum.

Annars Gulli eigðu hagkvæm jól og vonandi kemurðu með "hagnaði" út úr þeim.

[Hólmdís Hjartardóttir, 23.12.2008 kl. 22:06]

Gleðleg jól.