Ástarsæla

Eignaðist fyrir um tíu árum meri sem hét Ást og var frá Hemlu. Setti hana í folaldseign undir álóttu og vindóttu stóðhestana mína þá Hrímir frá Stafafelli og Lokk frá Gullberastöðum. Undan Ást komu snotur trippi. Set hér inn mynd af Fríðu frá Stafafelli sem er falleg bleikálótt meri. Hún hefur verið í eigu Maríettu á Höskuldsstöðum í Breiðdal og er á leið til Sviss í haust til systurdóttur hennar, sem er ein færasta hestakonan þar í landi. Þannig að trúlega á Fríða eftir að vinna lönd.

Á síðan Sælu frá Stafafelli undan Ást, sem að er vindótt og móálótt meri á fjórða vetri. Hún gekk í tvö ár undir merinni og voru þær mæðgur orðnar jafnstórar eftir þá mjólkurgjöf. Nú er Sæla að verða búin með skólagöngu í mánuð. Hún er spennandi hlekkur í vindóttu ræktinni minni. Fríða og Sæla eru báðar með sérstakt geðslag. Þær hafa verið forvitnar og sótt í félagsskap við manninn frá upphafi. Þær eru mjög taugasterkar og með góðan vilja.

Athugasemdir

[Ólafur Björnsson (IP-tala skráð) 10.3.2008 kl. 23:50]

Þetta eru glæsileg hross Gulli. Ég á eina rauðvindótta þyrfti að fá að koma henni undir fola hjá þér.

kv.

Óli Bj

[Árni Gunnarsson, 11.3.2008 kl. 08:42]

Gullfalleg hryssa. En ég er að velta vöngum yfir litnum. Hefur það verið úrskurðað að þetta sé bleikálótt? Miðað við það sem myndin sýnir er hryssan einfaldlaga fífilbleik.

[Gunnlaugur B Ólafsson, 11.3.2008 kl. 08:58]

Óli ég á stóðhestsefni Topp frá Stafafelli sem ég vonast til að sé arfhreinn vindóttur. Þannig að möguleiki er að tefla honum á móti rauðvindu þinni.

Árni þetta er góð athugasemd. En það sést nefninlega dekkri áll (rauður) eftir baki, dekkri fætur og haus. Þannig að hún hefur álótta genið í sér þó það sé í rauðum lit en ekki brúnum.