Yndislega Akureyri

Margir leggja leið sína til Akureyrar vikuna fyrir páska og yfir hátíðina. Þar gegnir skíðamennskan og Hlíðarfjall stóru hlutverki. Að hafa slíka frábæra útivistarparadís í bakgarðinum eru einstök hlunnindi. Bærinn sjálfur er svo hlýr og notalegur. Akureyringar eru í allt öðrum takti heldur en hinn almenni íbúi höfuðborgar. Taugarnar eru ekki þandar í hversdagslegu amstri. Þú ert ekki tortrygginn á bílana á götunum, býst ekki við að það verði svínað á þig eða flautað. Þar að auki er búið að undirstrika göfug gildi í hinu mannlega samfélagi með því að setja hjörtu á verslanir og þjónustustaði. Þetta fannst mér mikill yndisauki, enda áhugamaður um kærleika og gott flæði.

Það er svo mikið af húsum sem að maður skynjar að hafi merkilega og góða sál. Bæjarbúar virðast líka hafa þor til að vera frumlegir í garðskreytingum. Það er merkilegt að hugsa til þess að á þeim tíma sem að ríkti mesta efnahagslega góðæri í sögu landsins þá voru byggð ljótustu húsin, andlausir ferkantaðir kassar. Ekkert nostur og fegurð. Áherslan var ekki á hin nærandi og skapandi element í mannlífinu. Nú höfum við tækifæri til að setja okkur ný viðmið, nýja tegund ríkidæmis og þar er margt í þeirri stemmingu sem er á Akureyri til fyrirmyndar.

Gleðilega páska

 

 

   

                                               

Athugasemdir

[Benedikt Sigurðarson, 12.4.2009 kl. 18:03]

Takk fyrir jákvæða kveðju til Akureyrar.   Gott að bærinn og bæjarbragurinn verkar vel á gestinn.

Ekki dettur mér í hug að spilla fyrir þér páskagleðinni með því að benda á neitt eða nokkuð sem farið hefur á skjön - eða er öðruvísi en vera ber.  (Það er ábyggilega líka nauðafátt - á svona góðum degi )

Við sem erum hér heimakær gerum okkur ekki endilega grein fyrir því hvernig bærinn virkar á gesti og gangandi . . . . . en það eru "óefnisleg verðmæti" eða viðskiptavild í því sem þú tjáir í þinni færslu.

Verðum í sambandi endilega eftir páskana . .

[Jóhannes Guðnason, 12.4.2009 kl. 18:14]

Þarna er ég nú innilega sammála þér Gunnlaugur,ég bjó þarna í fimm ár,en dúllan sem ég er skotin í bjó á Akureyri í 30 ár,já ég elska Akureyri,en því miður er svo mikill launa munur á milli norðurlands og suðurlands,að maður tók þann pólinn að flytja suður,en hjartað minn var eftir fyrir norðan,svo er svo svakalega fallegt þarna,ég á eftir að flytja aftur norður vonandi,flott hjá þér Gunnlaugur að þér líður svona vel fyrir norðan,kær Páska kveðja.

[Sigrún P (IP-tala skráð) 13.4.2009 kl. 01:25]

Ég er sammála. Akureyri er einkar fallegur bær með flotta bæjarstjórn sem þorir að hafa skoðanaskipti við íbúa. Við erum ekki svona heppin hér í Mosfellsbæ.

Áfram Akureyri!

[Hallgrímur Guðmundsson, 13.4.2009 kl. 08:48]

Sæll Gulli og takk fyrir góð orð um bæinn. Það er ótrúlega afslappandi að búa hér, ekkert stress og brjálæði sem því miður einkennir borgina sunnan heiðar. Við sem búum í borginni norðan heiða vitum nákvæmlega að við komumst ekkert hraðar á milli staða þótt við liggjum á flautunni eða svínum duglega á samborgurum okkar..

Segðu mér eitt, komstu í heimsókn um páskana og það án þess að láta vita af þér?

[Gunnlaugur B Ólafsson, 13.4.2009 kl. 09:41]

Já, við fengum úthlutað íbúð frá KÍ í Hafnarstrætinu í fimm daga fyrir páska og það var verið á skíðum mest allan tímann. Ég þurfti svo mikla endurþjálfun enda tuttugu ár síðan að ég hafði sveiflað mér á svigskíðum. Ég hitti á Beggu frænku frá Gufudal í snjóbreiðunni og melduðum við okkur í kaffisamsæti. Annars létum við eins og við værum ein í heiminum. En Halli þú varst fyrir langalöngu búin að nefna viðlit í Mosó.   

[Hallgrímur Guðmundsson, 13.4.2009 kl. 11:44]

Sæll aftur, ég verð að bera við alvarlegum tímaskorti fá því að ég nefndi þessi heimsókn. Þau fáu skipti sem ég hef komið suður þá hefur einungis verið stoppað í örfáa klukkutíma, flogið að morgni og til baka seinnipartinn, sem sagt pökkuð dagskrá.

Þetta breytist vonandi með hækkandi sól og ég næ að efna loforðið...