Blóm vikunnar Einir

Einir er reyndar ekki blóm. Fræplöntum er skipt í berfrævinga, sem eru einkum barrtré og dulfrævinga sem einnig nefnast blómplöntur. Einir er eina barrtréð sem vex á Íslandi, en það er oftast sem runni, lágvaxinn og greinar skríða meðfram jörðu. Þar sem hin dæmigerðu grenitré sem nýtt eru til jólahalds voru ekki til hér á landi fyrr á tíð, voru heimagerð tré skreytt með eini og lyngi. Þar liggur merkingin í "göngum við í kring um einiberjarunn". Eitt slíkt gamalt heimagert tré er til á Stafafelli en þó var fyrir löngu hætt að skreyta það á gamla vísu, þegar ég er að alast upp. En það hefur verið í fullum skrúða í Gamla bænum á sínum tíma.

Þessi einiviður á myndinni var í Leiðartungum, Kollumúla þann 6. ágúst 2003 umlukin krækiberja- og bláberjalyngi. Hann er með mikla berköngla, sem eru kvenkyns, en karlkönglar eru minni. Einiberin eru mjög gott krydd á villibráð og lambakjöt. Þau þurfa þó að vera orðin þroskuð, en það er ekki fyrr en þau eru tveggja ára og bláleit á litinn. Þegar ég er með gönguhópa til fjalla þá er algengt að grillað sé síðasta kvöldið og kryddað með einiberjum, söxuðu birkilaufi og blóðbergi.

Athugasemdir

[Hólmdís Hjartardóttir, 21.12.2007 kl. 01:29]

um   finn alveg ilminn

[Hrönn Sigurðardóttir, 21.12.2007 kl. 09:58]

Vel við hæfi að hafa Eini í jólavikunni!

[Margrét (IP-tala skráð) 21.12.2007 kl. 20:29]

En gaman væri að vita hvaðan nafnið kemur.Spyr ég vegna þess að ég hitti Walesbúa sem á dóttur sem ber nafnið Einir sama stafsetning og borið eins fram.

[Starri Heiðmarsson, 21.12.2007 kl. 22:40]

Langar bara að benda á mikilvægi tíðar! Einir VAR eina barrtréð sem óx á Íslandi! Núorðið vaxa hér ýmsar tegundir bæði grenis og furu (þallar) og sömuleiðis lerki.

[Gunnlaugur B Ólafsson, 22.12.2007 kl. 00:58]

Starri, meiningin í "vex" var að vísa til þeirra plantna sem fjölga sér og hafa útbreiðslu í flóru Íslands. Síðan er auðvitað nú orðið hundruðum tegunda sem hefur verið plantað. Sumar frjóvgast og fjölga sér, en aðrar ekki.