Snjór er stundarfyrirbæri

Snjór er í eðli sínu stundarfyrirbæri sem kemur og fer eftir hitastigi. Það er því hæpið að tala um verndun hans eða nýta ytri mörk jökuls á tilteknum tíma sem landamerki í þjóðlendulínu.

Helgi Björnsson jöklafræðingur hefur haldið því fram að skriðjöklar og sá hluti Vatnajökuls sem nær yfir í Lón verði horfinn á næstu 30 árum. Með því verður vatnasvið Jökulsár í Lóni orðið jökullaust.

Af þeirri ástæðu og fleiri er eðlilegt að virðing sé borin fyrir mörkum Stafafells í Lóni sem byggja á fornri hefð um vatnaskil og ár sem meginviðmið. Slík nálgun fylgir venjum og gefur rökrétta heild.

Lögmenn og verndarsinnar hafa farið offari með reglustikuna og dregið ný mörk byggð á snjóalögum eða fornbókmenntum, legu jökuls og lýsingum Landnámu.

Friðland, þjóðlenda, einkaafréttur, eignarland sem eru afleiðingar af reitaskiptingu ríkisins verða hverful stundarfyrirbæri eins og snjórinn. Stafafell í Lóni er afmörkuð heild út frá sterkum landfræðilegum og sögulegum forsendum.

Langjökull horfinn eftir öld?

Lukkulegur og grannur

Í gær kom ég úr síðastu gönguferð sumarsins, þar sem ég kynni Stafafell í Lóni. Vandleitað er að jafn spennandi og skemmtilegri sumarvinnu.

Hinir frábæru göngufélagar síðustu fimm daga voru af Álftanesi og er hópur sem myndaður var í tengslum við meirihluta bæjarstjórnar.

Það er alltaf gaman að hafa unga fólkið með í svona ferðum og þarna voru fimm vaskir sveinar sem létu sig ekki muna um að skella sér til sunds eða í klettaklifur.

Þessi fjallamennska hefur hreinsað af mér bloggspik síðasta vetrar. Nú fer að styttast í skólahald og næstu dagar fara í að fínslípa texta sem ég hef samið fyrir kennslu í líffræði.

Jafnframt mun formennska í Varmársamtökunum taka sinn tíma og hef ég metnað til að samtökin gegni skapandi hlutverki; vettvangur mannlífs og farvegur skoðanaskipta.

Sameiginlegar stoðir til framtíðar

Nú reynir Björn frændi vor að fikra sig af stað í brúarvinnu. Á næsta ári er landsfundur Sjálfstæðisflokksins og þeir eiga alveg eftir heimavinnuna. Almenningur, samtök iðnaðar og félag kaupmanna krefjast skilvirkni í stefnumótun um framtíðartengsl og stöðu okkar í álfunni. Björn Bjarnason er nægilega skynsamur maður til að átta sig á að tilburðir flokksins til að svæfa málin eru ekki vænlægir til árangurs.

Dómsmálaráðherra skynjar þörfina á að brúa bilið milli viðhorfa almennings og atvinnulífs annarsvegar og einangraðrar forystu Sjálfstæðisflokksins hinsvegar. Nauðsyn þess að skjóta fleiri stoðum undir samstarfið við Evrópusambandið. Krafan um upptöku evru er háværust og eðlilegt að byrja á að tefla því fram einu og sér. Þorgerður Katrín hefur verið ein á báti með þá yfirlýstu stefnu að tímabært sé að gera ítarlega úttekt á stöðu Íslands gagnvart ESB og útilokar ekki aðild.

Nú hefur ráðherrann áttað sig á að hann er ekki  í takt við stemminguna með því að vísa eingöngu í Evrópuskýrslu sem að hann lét taka saman í fyrra eða hittifyrra. Það þarf að láta verkin tala. Björn vill hafa stöplana undir brúnni þrjá; EES samninginn, Schengen samstarfið og upptöku evru. Opnað er á frekari umræðu og nánari tengsl. Það er nýjung og vert fullrar athygli. Dómsmálaráðherra, menntamálaráðherra og fleiri í forystu flokksins munu sjá að best er að brúin sé öflug og traust, frekar en að farið sé af stað af hálfum hug með skotröftum og skammtímalausnum.

Evruleið fremur en aðildarleið?

Kennaragöngur

Síðastliðið haust samdi ég við Kennarasamband Íslands um að skipuleggja gönguferðir um Stafafell í Lóni sem er að ná fullum þroska sem eitt stærsta og fjölbreytilegasta útivistarsvæði landsins. Eskifell og Kollumúli voru aðalbækistöðvar okkar eins og tíðkast hefur hjá smalamönnum um langt skeið.

Í gær kom síðasti hópurinn af þremur til byggða. Hann var 27 manna, sem er með allra stærstu hópum sem ég hef farið með, en auk fararstjórnar var matreiðsla á mínum höndum. Verð að viðurkenna að í mér var örlítill beygur að vegna fjöldans yrði erfitt að halda utan um verkefnið.

Nú er fimmtán dögum á fjöllum með kennurum lokið. Ég hef fulla trú á þessu stefi í orlofsmöguleikum. Svona pakki með göngu í fimm daga, gistingu í skálum, kvöldmat, trússi og rútuferð til baka er á svipuðu verði og sumarhús í viku.

Hópurinn sem kom til byggða var sá besti og skemmtilegasti sem ég hef farið með til fjalla. Það hefur mér reyndar fundist um flesta hópa áður, sem farið hafa í slíkar lengri gönguferðir. Það er alltaf ánægjulegt að finna þá sterku samkennd sem yfirleitt myndast í ferðunum.

Hendi hér inn myndum úr KÍ göngum.

Frjálst er í fjallasal

Kom með fyrsta gönguhóp sumarsins af fjöllum Stafafells í gær. Fyrsti kennarahópur af þremur hefur spásserað um gil, gljúfur, mela, skriður og skógarbrekkur. Allir sáttir og sælir, trúi ég. Næsti leggur af stað í fyrramálið. Enginn tími til að vera á netinu, enda ekki ástæða til yfir hábjargræðistímann.

                                            Með góðri kveðju,  G

KÍ hópur * Stafafell 21-25. júní * Brenniklettur

Birkihrísla í skriðu við Kambaklofa

KÍ hópur * Stafafell 27. júní -1. júlí * Hvannagil

"Djarfi" hluti hópsins

126 hreindýr voru á beit í Víðidal

KÍ hópur  * Stafafell 6. júlí - 10. júlí * Kambaklofi (tvo vantar á myndina)

Réttur kvöldsins - Kjúklingabringur í tortillum mað allskyns annari hollustu

Lambalærin krydduð með blóðbergi, einiberjum og birkilaufi að verða tilbúin á grillið

Kjánar, karlagrobb og krepputal

Kjánagrey með slagorðum Frjálslynda flokksins trufluðu athöfnina á Austurvelli. Forsætisráðherrann nýtti tækifærið til að upphefja Bjarna Benediktsson, ásamt því að minna fólk á afleiðingar efnahgsþrenginga.

Fjallkonan er hið rómantíska stef dagskrárinnar, en maður spyr sig hvort ekki sé hægt að sameinast um virðulega og skemmtilega stemmingu á þjóðhátíðardaginn. Þar eiga hvorki að vera mótmæli né einhver innræting um mikilleika forustumanns Sjálfstæðisflokksins.

Drögum fram gleðina með skilvirkari hætti. Gætum lært af Norðmönnum hvernig blanda má saman virðingu, hátíðleika, gleði og skemmtun á þjóðhátíðardaginn. Veðrið er allavega ekki að spilla.

                                    Til hamingju með daginn - lifum og njótum!

Forsætisráðherra bjartsýnn

Fjallarúta

Nú er ljóst að þessi fræga hálendisrúta verður í ferðum á Illakamb frá Stafafelli í Lóni í sumar. Samstarfsaðili síðustu ár ákvað að hætta og því varð að leita nýrra lausna. Rútan er 24 manna og er því hentug stærð fyrir hópa til gistingar í skálum í Eskifelli og Kollumúla, en það er um það bil hámarksfjöldi. Einnig hentar hún vel til ferða yfir Skyndidalsá sem stundum getur verið viðsjárverð.

Jóhannes Ellertsson sem að er búin að vera í rúturekstri í fimmtíu ár verður sjötugur eftir tæpa viku og er að selja úr flota sínum og á einungis tvær rútur eftir. Það er vonandi að rútan fái veglegt hlutverk í Lóninu og að henni verði viðhaldið þannig að hún endist mörg ár til viðbótar.

Faðir vor er himinn

Alexandara Kjuregej Argonova er engum lík. Hún hefur búið hér á Íslandi í tæp fjörutíu ár og haft litrík og góð áhrif á íslenskt samfélag. Verið virk í leiklist, myndlist og heilsutengdu starfi s.s. nuddi.

Kjuregej kemur frá Jakútíu í Síberíu og stóð í gær fyrir vígslu á húsi við botn Hvalfjarðar sem byggt er að jakútískum stíl. Húsið verður menningarsetur landanna sem aðsetur fyrir skapandi fólk.

Ef einhvern tíma var ástæða til að vera með myndavél þá var það í gær. En hún gleymdist. Húsbyggjandinn var í essinu sínu og í búning frá heimalandinu ásamt fleiri gestum.

Prestar frá sitt hvoru landinu sameinuðu andana. Það var gaman að heyra af trúarviðhorfum jakúta. Þar er jörðin móðir, himininn er faðir, eldurinn afi og vatnið er amma.

Þannig að ef til vill höfum við einhvers staðar villst af leið með því að halda fram að faðir vor sé á himni. Hugsanlega er hann bara himinn og frjóvgar jörðina. Er þá nokkur þörf fyrir kvennakirkju?

Á lífi

Tónleikarnir Mús Mos voru í Álafosskvos í dag. Skipuleggjendur voru íbúar í kvosinni og Varmársamtökin með stuðningi frá Mosfellsbæ. Samtökin héldu fyrir rúmu ári stórtónleika með Sigurrós og fleiri undir slagorðinu "Lifi Álafoss". Þrátt fyrir þá skerðingu á þessari veröld sem að er mjög sérstök, með veglagningunni alræmdu, þá var í dag sérlega fagurt og fjölbreytilegt mannlíf undir bláhvítum fána á þessum sögulega stað. Stallarnir í brekkunni frá samkomuhaldi fyrr á tíð nýttust vel og sól var bæði í sinni og hátt á himni.

Set hér inn myndir frá þessum degi sem tókst í alla staði sérlega vel og verður vonandi að hefð í mannlífi Mosfellsbæjar. Ég þekkti ekki hluta af þeim sem eru á myndunum. Hægt er að klikka á myndina til að hún stækki.

Gleðidagur Írlands?

Hinn sundurlausi og tiltölulega fámenni kór sem eyðir lífsorku sinni í að andmæla samvinnu innan álfunnar okkar, hefur nú fundið farveg hamingjunnar undir neikvæðum formerkjum. Þeir fagna því að þjóðaratkvæði á Írlandi hafi hafnað Lisabon samningnum. Inntak hans er að gera stjórnsýslu sambandsins skilvirkari. Hefur gagnrýni þeirra sem vilja vera hér einir á skeri og engum tengdir ekki verið á þeim nótum að sambandið sé þunglamalegt og óskilvirkt bákn?

Írar eru og hafa alltaf verið mjög hlynntir Evrópusambandiu. Vafalítið höfðu afskipti franska utanríkisráðherrans af málinu, þar sem að hann hótaði því að írar myndu hafa verra af höfnuðu þeir samningnum. Ljóst er að 1% íbúa í sambandinu getur ekki komið í veg fyrir umbætur og breytingar. Vandi forsætisráðherra Írlands í dag er að hlusta á vilja þjóðarinnar og að tryggja að landið verði áfram með á Evrópulestinni.

Nei hópurinn á Írlandi náði upp stemmingu sem dugði til að hafna samningnum. En hann hafnar af sundurleitum ástæðum og aðalatriðið er að hann veit ekki hvað hann vill. Fámennur hópur er á móti sambandinu, sumir eru á móti því sem að haldið hefur verið fram að verði sambandsríki með eigin utanríkisstefnu. Írland er friðelskandi þjóð í alþjóðasamfélaginu. Sumir höfnuðu samningnum vegna afskipta annara þjóða. Eftir stendur að vandi íra og þeirra sem höfnuðu er ekki leystur. Hvernig vilja þeir sjá framtíð og samskipti Írlands og Evrópusambandsins?

Það eru því merki sjálfseyðingarhvatar sem birtast í fagnaðarlátum íslenskra andstæðinga sambandsins þar sem þeir fagna niðurstöðunni og vonast til að hún leiði til "sundrungar", "upplausnar" og "minnkaðs sjálfstrausts" innan Evrópu.