Eru Laugvetningar Framsóknarmenn?

Á Laugarvatni horfir Jónas frá Hriflu yfir staðinn. Í ML man ég samt ekki eftir að nokkur maður gengist við því að vera Framsóknarmaður, enda töldu menn sig á leið inn í framtíðina. Bjarni Harðar fór síðan og tók sagnfræði og þjóðfræði. Komst að því að fortíðin væri framtíðin og gerðist Framsóknarmaður. Samúel Örn var íslandsmeistari í blaki og ekki tengdi maður þennan kvennaljóma við flokk neftóbaksklútanna. Nú virðast mál vera að skipast þannig að ML-ingar eru hver á eftir öðrum að koma út úr skápnum og birtast á þingi sem framarar.

En er það áhugavert hlutskipti okkar sveitapilta og stúlkna sem fórum á Laugarvatn að halda lífinu í Framsóknarflokknum. Samfylkingin er búin að fylla stöðuna sem frjálslyndur félagshyggjuflokkur og fátt sem bendir til að Framsóknarflokkurinn eigi sóknarfæri í þéttbýlinu við Faxaflóa. Einnig er stór hluti íbúa á landsbyggðinni ósáttur við flokkinn. Kenna honum um kvótakerfin til sjós og lands sem séu meginafl hinnar miklu byggðaröskunar og skerðingar á athafnafrelsi. Því eru atkvæðin sem voru í fastri áskrift á landsbyggðinni líka horfin.

Ég óska fulltrúum Laugvetninga í framvarðasveit þjóðar alls hins besta, á sama tíma og ég er sannfærður um að framtíð flokks þeirra er langt frá því að vera björt. Flokkurinn færðist í gegnum áratugina frá því að hafa trausta samfélagslega skírskotun í það hlutverk að vera atvinnumiðlun, en núna þegar þeir hafa ekki lengur fingur á valdataumum þá er leitin að erindinu fálmkennd og örvæntingarfull.

Nýtur hverrar mínútu

Blóm vikunnar Skógarflétta

Fléttur eru sambýli þörungs og svepps. Mikið er af sjaldgæfum fléttutegundum í Austurskógum, Stafafelli í Lóni og nefnt hefur verið að ástæða sé til að friðlýsa þá af þeirri ástæðu. Tegundir sem vaxa á birki eru nokkuð algengar á Suð-Austurlandi. Þar eru nefndar flathyrna, skógarþemba, flatþemba, pípuþemba, gljádumba, kvistaskegg og birkiskegg. Flestar flétturnar á trjánum eru gráleitar, ýmist flatar eða pípulaga. En þó rakst ég þar á fléttuna á myndinni hér að ofan fyrir nokkrum árum. Ágúst H. Bjarnason grasafræðingur var búin að finna út nafnið fyrir mig og verð ég að grafa það upp. Ekki er mynd af þessari fléttu í plöntuhandbókum eða á vefnum www.floraislands.is.

Gullfoss með glæstum brag

 

Óskaplega er hægt að teygja lopann um þessa flugferð. Vinstri grænir reyna enn og aftur að nærast á nöldri og óánægju. Ögmundur Jónasson félagi minn fer mikinn. Mesta svigrúm sálartetursins fer í óvitræna dómhörku og vandlætingu út af mun á flugkostnaði, með einni leið eða annarri, upp á 200 þúsund krónur. Á sama tíma hækka húsnæðislán meðalfjölskyldu um hundruði þúsunda vegna gengisfellingar og gefið er upp að hluti ástæðunnar hafi verið meira svigrúm til umræðna og viðbragða við efnahagsástandinu.

Þeir eyða ekki orkunni í að krefjast þess að frumvarp Valgerðar Bjarnadóttur um leiðréttingu á eftirlaunafrumvarpinu gangi í gegn á þessu þingi. Enda voru þeir stuðningsmenn þess, allir sem einn. Þeir kvarta heldur ekki undan því að þiggja laun fyrir að gegna tveimur eða fleiri hlutverkum. Ef þeir væru samkvæmir sjálfum sér í þessari þotuumræðu þá ættu þeir að leggja til að við hverfum aftur ein hundrað ár og ráðamenn tækju vorskipið eða haustskipið. Það skyldi þó ekki vera að þeir væru þátttakendur í "lúxusnum" .

Útþráin eykur mátt,  ung verður gömul þrá
G#7                           C#m  C#7                       F#7
syngjum og dönsum dátt,   dvelur oss gleðin hjá.
B                        F#7  B          A#     B
Lifum vér ljúfan dag,  létt eru þessi kjör
G#7                               C#m   F#7                     B
Gullfoss með glæstum brag,  greiðir oss heillaför.
B                     B7          E     Em   B                F#7   B       (Hækkun)  G7
Gullfoss með glæstum brag,       greiðir oss heillaför.

Þotuleigan var 4,2 milljónir

Offita er hugarástand

 

Þó birting offitu sé klárlega líkamleg, sem er hægt að staðfesta með því að klípa í bumbuna eða stíga á vigtina, þá er orsökin oftast í lífsmynstrinu. Vesturlandabúar vanmeta áhrif hugans á jafnvægi í efnaskiptum. Þrátt fyrir að Bandaríkjamenn og reyndar við líka ræðum fátt meira en offitukúra með vísan einvörðungu í mataræði og hreyfingu þá breiðist faraldurinn enn sem eldur í sinu. Það sýnir okkur að við þurfum nýja nálgun.

Við stress losnar kortisól sem kallar á skyndibita og kolvetni, í djúpsvefni losna ýmis mikilvæg hormón fyrir efnaskipti, snerting og nudd losa ýmis góð efni svo sem endorfín. Góð líkamsvitund er að kunna að lifa og njóta, takast á við verkefni með áhlaupi en geta losað hugann frá þeim inn í slökun og nærandi svefn. Bókin "Franskar konur fitna ekki" undirstrikar einmitt þessa þverstæðu. Njótum án samviskubits.

Offitufaraldur á Íslandi

Góður þáttur

Utanríkisráðherra var gestur Hjálmars Sveinssonar í útvarpsþættinum Krossgötur í dag. Hún á hrós skilið fyrir að opna umræður um utanríkismál og útskýra möguleika okkar í stefnumótun. Hreinsa burt hinn dularfulla blæ sem sveipaði þennan málaflokk í kaldastríðinu og þegar stefna okkar var að mestu mótuð í Washington. Ljóst er að sjálfstæði okkar sem þjóðar hefur aukist með því að landið hefur nú eigin stefnu í varnarmálum. Virkni okkar og hugmyndavinna innan NATÓ og ESB getur gefið undirstöður fyrir frumkvæði og sjálfstæða stefnu innan hins alþjóðlega samstarfs. Þar eru ólíkar áherslur og okkar rödd þarf að vera þar og hafa vægi. Ingibjörg Sólrún var í þessum þætti sterkur fulltrúi þess sem hún sjálf hefur nefnt umræðustjórnmál.

Brot eða mistök, ásetningur eða óhapp

Hannes Hólmsteinn hefur umbreyst í hinn mannlega og bljúga prófessor, sem horfir fram á að taka upp breytt og betra líf. Það er vel. Mikilvægt að við losnum undan hinum hrokafulla valdstíl íslenskra stjórnmála, sem að Hannes Hólmsteinn og Davíð Oddson hafa verið tákn fyrir. Hann telur sig hafa orðið að liði við að gera íslenskt samfélag opnar og frjálsara. En einmitt með því að taka niður trúboðskennda Friedman frontinn innleiðir hann opnara og frjálsara samskipti. Það voru einmitt slíkir eiginleikar stjórnmálamanns sem þjóðin kunni að meta við Steingrím Hermannsson fyrrum forsætisráðherra. Að vera hreinn og beinn.

Það er þó til umhugsunar hvaða hugtök Hannes Hólmsteinn notar í viðtölum. Hann hamrar á því að hann hafi "gert mistök", að hann muni "læra af mistökunum" Þetta minnir á þingmanninn sem lenti í því óláni að gera "tæknileg mistök". Hann líkir því saman að Halldór Laxnes hafi notað sögusagnir af fólki sem efnivið í frásagnir sínar. Það er vissulega rétt. Man t.d. eftir því að 1985 þegar ég þvældist um slóðir Vestur-Íslendinga að þá var á elliheimilinu Betel á Gimli maður sem hét Eddi Gíslason og vissi um nöfn og atvik öll í smásögunni Nýja Ísland. En á slíkum munnmælasögum ríkir engin höfundarréttur og nóbelskálædið gefur þeim aukið líf og krydd. Umbreytir þeim í skáldsögu.

Hannes Hólmsteinn vann undir formerkjum fræðilegrar úttektar á æviferli Halldórs Laxness, ekki að umbreyta sögum af lífshlaupi hans í skáldsögu. Þarna er mikill munur. Í seinna tilvikinu má það vera öllum ljóst að þegar texti frá fjórtán höfundum er notaður að þá þarf að sundurgreina hvað kemur frá hverjum. Ekki er hægt að mynda út frá því nýja samfellu og láta sem að hún sé eigin sköpun. Það er ritstuldur og lögbrot. Langafi minn skrifaði um herferðir víkinga mikið fræðirit, þar sem að eru tilvitnanir í heimildir á eftir hverri setningu. Þetta var fyrir rúmum hundrað árum. Því halda skýringar Hannesar ekki vatni, að breytingar hafi orðið á lögum eða að um einhverja nýstárlega túlkun Hæstaréttar á höfundarrétti sé að ræða.

Hvort sem að gjörningurinn er ásetningur eða óhapp er hann ekki í anda almennra og alþjóðlegra viðmiða um fræðimennsku. Þar liggur kjarninn í þeim vanda sem málið skapar fyrir Háskóla Íslands og trúverðugleika hans.

Smáþotu fyrir forseta vorn og ríkisstjórn!

Það er full ástæða til að ræða það í alvöru hvort ekki sé sú stund komin að kaupa beri litla þotu fyrir forseta vorn og ríkisstjórn. Miðað við allt og allt í kostnaði við hin miklu samskipti þjóða er það ekki það vitlausasta að eiga nothæft farartæki til að fljúga yfir sundið. Ekki síst þegar við erum orðin gild og virk í þróun sameinaðrar Evrópu. 

 

Munaði 100-200 þúsund krónum

Supersized

Mótmælin við Austurvöll sýndu vel að það þarf að minnka meðalstærð bíla á götum Reykjavíkur. Það á að nota tröllvaxna og breytta bíla á fjöllum, jöklum og stórfljótum, en umhverfisvæna smábíla til reddinga og vinnustaðaaksturs í borginni við sundin. Styð áframhaldandi stefnumótun þar sem að álögum er létt af innflutningi slíkra faratækja, lægri gjöld, frí bílastæði og fleira. Það þarf viðhorfsbreytingu.

Mótmælt við Austurvöll

Bravó fyrir Ikea

 

Á meðan sumir flýta sér að hækka vörur um tugi prósenta ætlar Ikea að halda verðinu óbreyttu til haustsins. Þannig munu listaverð standa óbreytt í eitt ár. Stöðugleiki gefur af sér stöðugleika. Hefðu olíufélögin, bændasamtökin og aðrir ekki getað lýst yfir því sama? Fyrirtækið á hrós skilið fyrir þessa ákvörðun

Í tilkynningu segir; "Í tilefni fréttaflutnings undanfarna daga, þar sem fram hefur komið að innfluttar vörur eins og húsgögn og raftæki hafi hækkað verulega í kjölfar veikingar íslensku krónunnar, vill IKEA benda á að allar vörur, tæplega 300 að tölu, sem finna má í vörulista IKEA 2008 munu ekki hækka í verði. Uppgefið verð í vörulistanum hefur verið í gildi síðan í ágúst á síðasta ári og mun áfram gilda til 15. ágúst næstkomandi. IKEA stendur við verð sín og mun þar með halda sínu lága vöruverði eins og það birtist í vörulistanum".

Tími sáttagjörða

Ein helsta ástæða þess að "andstæðingarnir" í litrófi íslenskra stjórnmála mynduðu ríkisstjórn var sterkur meirihluti. En stjórnarmyndun var fylgt úr hlaði undir því fyrirheiti að leita sátta um farsælar leiðir við stjórn landsmála. Nú er ljóst að gengið hefur verið glæfralega fram í fjármálum síðustu ár, einstaklingar, heimili og fyrirtæki. Skuldir Íslendinga eru svimandi háar, þó ríkissjóður sé að mestu skuldlaus, enda búin að selja margar af bestu mjólkurkúnum, bankana og símann.

Stjórnvöld síðustu áratuga geta þó ekki annað en borið ábyrgð á græðgisvæðingunni í landinnu. Því stingur það mjög í stúf að heyra Davíð Oddsson tala til landsmanna með þeim hætti að honum komi þetta á óvart og eigi ekki hlut að máli. Neyslan, þenslan, eyðslan og græðgin er skilgetið afkvæmi frjálshyggjustefnu fyrrverandi forsætisráðherra. Nú kemur síðan fram að þessi mikla velmegun sem hann státaði af að innleiða hér á landi var meira og minna loftbóla byggð á hömlulausum erlendum lántökum og viðskiptahalla.

Stjórnarandstaðan talar um "slappa" og "ónýta" ríkisstjórn. En trúlega skynja flestir að það er ekki rétti tíminn fyrir sundrungu pólitískra víga og við verðum sameiginlega að benda á leiðir út úr vanda. Hver og einn verður að draga úr sóun og þess vegna er eðli vandans ekki austur á Kárahnjúkum eins og formaður Vinstri grænna hélt fram í kvöldfréttum. Við höfum eytt um efni fram. Stefnum á að kaupa örlítið færri jólaseríur fyrir næstu jól.

Ágætt og upplýsandi viðtal er við Vilhjálm Egilsson framkvæmdastjóra Samtaka atvinnulífsins í 24 stundum í dag. Hann bendir á að verkfæri Seðlabankans hafa engu skilað. Vextir eru komnir upp í 15% til að reyna að láta þá hafa áhrif, en einmitt með þeim hætti erum við að skipa okkur í flokk með löndum með mjög óþróað fjármálaumhverfi og undirstrika þann ótta sem erlendar lánastofnanir hafa haft um stefnuna hér á landi í peningamálum.

Í Evrópumálum er þessi fyrrverandi þingmaður Sjálfstæðisflokksins á svipuðu róli og forveri hans hjá VSÍ og fyrrum forsætisráðherra Þorsteinn Pálsson. Þessir menn þekkja betur en margir hið alþjóðlega fjármálaumhverfi. Talsmaður atvinnulífsins telur að peningastefnan hafi dregið úr tiltrú á gjaldmiðlinum og segir að eftir "því sem núverandi ástand varir lengur verður evran sífellt meira aðlaðandi kostur í huga almennings og fyrirtækja".

Vilhjálmur hefur mjög jákvæða afstöðu gagnvart ESB sem slíku, en efast um fjárhagslegan ávinning fyrir utan það er lítur að myntbandalaginu. Hann virðist því ekki reikna dæmið út á sama hátt og Eiríkur Bergmann og félagi hans gerðu í nýlegu riti og komust að þeirri niðurstöðu að efnahagslegur ávinningur af aðild væri mjög mikill. Hef ekki séð neinn draga í efa útreikninga þeirra. Ljóst er þó að engin getur reiknað slíkt fyrr en samningsdrög liggja fyrir í framhaldi af aðildarviðræðum.

Ríkisstjórnin verður á næstu misserum að koma inn sem sterkari kórstjóri og stilla af hina mismunandi tóna og hagsmuni. Hlusta og taka afstöðu, örva umræður og framkvæmdir. Hjálpum ríkisstjórninni, enda berum við mikla ábyrgð á ástandinu. Það eru ekki aðrir klárar sterkari til að bera trússið heldur en núverandi stjórnarflokkar.